საფრანგეთის ქალაქ ტომბლენში თვითმფრინავი ჩამოვარდა. შემთხვევას 11 ადამიანი ემსხვერპლა. ინფორმაციას BBC ავრცელებს.

პილოტი და ათივე მგზავრი დაიღუპა, მათ შორის ხუთი ინსტრუქტორი და ხუთი ადამიანი, რომლებიც პარაშუტით გადმოხტომისთვის პირველად ემზადებოდნენ.

თვითმფრინავი, რომელსაც პარაშუტისტთა სკოლა იყენებდა, ნანსი-ესეს აეროდრომიდან აფრინდა და ადგილობრივი დროით დაახლოებით 11:00 საათზე მოულოდნელად ჩამოვარდა.

საფრანგეთის შინაგან საქმეთა მინისტრის, ლორან ნუნიესის თქმით, პარიზის პროკურატურამ ინციდენტის მიზეზების დასადგენად გამოძიება დაიწყო.

ნუნიესმა დასძინა, რომ მსხვერპლთა ზოგიერთი ნათესავი კატასტროფის შემსწრე გახდა, რადგან ისინი აეროდრომზე მათი ახლობლების პირველი გადმოხტომის სანახავად იყვნენ შეკრებილნი.