ისრაელის მთავრობამ ოსმალეთის იმპერიაში სომეხთა გენოციდი აღიარა. მათ ამ საკითხს კენჭი კვირას, 29 ივნისს უყარეს. ინფორმაციას THE TIMES OF ISRAEL ავრცელებს.

საგარეო საქმეთა მინისტრმა გიდეონ საარმა, რომელმაც გასულ კვირას განაცხადა, რომ აღიარების საკითხს კვირას მინისტრთა კაბინეტის კენჭისყრაზე გაიტანდა, კანონპროექტის ერთხმად მიღების შემდეგ X-ზე დაწერა: "სწორი საქმის გასაკეთებლად არასდროს არის გვიან".

"ისრაელი უერთდება 32 ქვეყანას, რომლებმაც შეასრულეს მორალური ვალი ისტორიული სიმართლის აღიარებით და მისი უარყოფის მცდელობების უგულებელყოფით", — დაწერა საარმა.

ვიდეომიმართვაში მან აღნიშნა: "ეს საზარელი გენოციდი, რომელიც 100-ზე მეტი წლის წინ მოხდა და რომლის ფაქტებიც რეალურად სადავო არ არის, მოიცავდა 1.5 მილიონი ადამიანის მკვლელობას და უძველესი და ისტორიული კულტურული მემკვიდრეობის განადგურებას"

THE TIMES OF ISRAEL წერს, რომ თურქეთთან დაძაბულობის თავიდან აცილების მიზნით, ისრაელი დიდი ხნის განმავლობაში თავს იკავებდა სიტყვა "გენოციდის" გამოყენებისგან იმ მასობრივი მკვლელობების, დაპატიმრებებისა და იძულებითი დეპორტაციის კამპანიის აღსაწერად, რომელიც ოსმალეთის იმპერიამ არსებობის ბოლო წლებში სომხების წინააღმდეგ განახორციელა.

თურქეთი აღიარებს, რომ პირველი მსოფლიო ომის დროს ოსმალეთის ძალებთან შეტაკებებისას ოსმალეთის იმპერიაში მცხოვრები ბევრი სომეხი დაიღუპა, თუმცა დაღუპულთა რაოდენობას სადავოს ხდის და დიდი ხანია უარყოფს, რომ მკვლელობები სისტემურად იყო ორგანიზებული.