ჯანდაცვის მსოფლიო ორგანიზაციის (WHO) განცხადებით, 21 ივნისის შემდეგ, დაახლოებით იმ პერიოდიდან, როდესაც ევროპაში რეკორდული სიცხის ტალღა დაიწყო, ევროპაში 1300-ზე მეტი გარდაცვალების შემთხვევა დაფიქსირდა. ინფორმაციას Deusche Welle ავრცელებს.

"ამჟამად 150 მილიონი ადამიანი უკიდურესი სიცხის პირობებში ცხოვრობს, ასობით ადამიანი გარდაიცვალა, სკოლები დაკეტილია, ელექტროქსელები კი გადატვირთვას ვერ უძლებს," — დაწერა ჯანმოს ხელმძღვანელმა, ტედროს ადჰანომ გებრეიესუსმა პლატფორმა X-ზე.

მან დასძინა, რომ "21 ივნისის შემდეგ, ევროპაში მაღალ ტემპერატურასთან დაკავშირებული 1300-ზე მეტი გარდაცვალების შემთხვევა აღირიცხა".

გებრეიესუსის თქმით, გაეროს ორგანიზაცია მუშაობს თავის წევრ ქვეყნებთან და პარტნიორებთან ერთად, რათა აღმოფხვრას ექსტრემალური სიცხისგან გამოწვეული ჯანმრთელობის საფრთხეები. ეს სამუშაო "მზადყოფნაზე, პრევენციასა და ჯანდაცვის სისტემის უფრო ძლიერ რეაგირებაზე ფოკუსირებას" მოიცავს, ასევე ქვეყნების წახალისებას, დანერგონ "სიცხის დროს ჯანმრთელობის დაცვის სამოქმედო გეგმები".

"თერმულ სტრესს ხშირად "ჩუმ მკვლელს" უწოდებენ — ევროპული სახლები, სამუშაო ადგილები და სკოლები კი არ არის აშენებული ასეთი ტემპერატურისთვის", — აღნიშნა მან.