ჯანდაცვის მსოფლიო ორგანიზაციის (WHO) განცხადებით, ევროპაში ზაფხულის დასაწყისისთვის უპრეცედენტო სიცხის ტალღა, სავარაუდოდ, ასობით ადამიანის გარდაცვალების მიზეზი გახდა. ანომალიური სიცხე ამჟამად აღმოსავლეთისკენ გადაადგილდება, რის გამოც კვირას მაღალი ტემპერატურის რეკორდული მაჩვენებლები გერმანიაში, პოლონეთსა და ჩეხეთში დაფიქსირდა.

ორგანიზაციის ხელმძღვანელმა, ტედროს ადჰანომ გებრეიესუსმა პლატფორმა X-ზე აღნიშნა, რომ 21 ივნისის შემდეგ რეგიონში 1 300-ზე მეტი ჭარბი სიკვდილიანობის შემთხვევა დაფიქსირდა, რაც პირდაპირ უკავშირდება მაღალ ტემპერატურას.

მოქალაქეები ბერლინის საკათედრო ტაძრის მიმდებარე ტერიტორიაზე.

ფოტო: Reuters

"თერმულ სტრესს ხშირად "ჩუმ მკვლელს" უწოდებენ. პრობლემა ისაა, რომ ევროპული სახლები, სამუშაო სივრცეები და სკოლები უბრალოდ არ არის გათვლილი ასეთი სიცხისთვის", — აღნიშნა ჯანმოს ხელმძღვანელმა.

გერმანიაში ზედიზედ მესამე დღეა რეკორდულად მაღალი 41.7°C ფიქსირდება. ანომალიური სიცხეა ჩეხეთშიც, სადაც ბოლო ორ დღეში უკვე მეორე ტემპერატურული მაქსიმუმი, 41.1°C დაფიქსირდა.

ყველაზე მძიმე მდგომარეობა საფრანგეთშია, სადაც ჯანდაცვის სამინისტროს მონაცემებით, გასული ოთხშაბათის შემდეგ სიკვდილიანობის მაჩვენებელი მოსალოდნელზე 1 000-ით მეტია. უწყების განმარტებით, მსხვერპლთა უმეტესობა 65 წელს გადაცილებული მოქალაქეები არიან. აღსანიშნავია, რომ საფრანგეთში, ტემპერატურის მატებასთან ერთად, არაოფიციალურ საცურაო ადგილებში სულ მცირე 74 ადამიანი დაიხრჩო. უბედური შემთხვევების უმეტესობა ისეთ წყალსატევებში, ტბებსა და მდინარეებში მოხდა, რომლებიც მაშველების მიერ არ კონტროლდება.

მოქალაქეები პარიზში, ეიფელის კოშკთან მდებარე ტროკადეროს შადრევანში გრილდებიან.

ფოტო: Getty Images

ტედროს გებრეიესუსმა ხაზგასმით, კლიმატის ცვლილების ფონზე ევროპა დედამიწაზე ყველაზე სწრაფი ტემპით — გლობალურ საშუალო მაჩვენებელზე ორჯერ უფრო მეტად თბება. მისივე თქმით, ამჟამად მილიონობით ადამიანი გაუსაძლის პირობებში ცხოვრობს: რეგიონში დაკეტილია სკოლები, ხოლო გადატვირთული ელექტროქსელები კოლაფსის პირასაა.

ივნისის ამ რეკორდული სიცხის მიზეზად სინოპტიკოსები "თერმულ გუმბათს" ასახელებენ. ამ დროს ცხელი ჰაერის მასები მაღლა ასვლის ნაცვლად მიწისკენ ეშვება, დაბლა ჩამოსვლისას იკუმშება და კიდევ უფრო მეტად ხურდება. ამავდროულად, ეს პროცესი აშრობს ჰაერს, რაც ღრუბლების წარმოქმნას უშლის ხელს. შედეგად, მცხუნვარე მზე მიწის ზედაპირს კიდევ უფრო მეტად ახურებს.

ტედროს გებრეიესუსის თქმით, ის, რაც ადრე "თაობაში ერთხელ" მომხდარ ანომალიად ითვლებოდა, ახლა თითქმის ყოველწლიურ მოვლენად იქცა. ჯანმოს ხელმძღვანელმა ევროპულ ქვეყნებს მოუწოდა, მოსახლეობის ჯანმრთელობის დასაცავად სასწრაფოდ აამოქმედონ საგანგებო გეგმები.