რუსეთის პრეზიდენტმა, ვლადიმერ პუტინმა განაცხადა, რომ შესაბამისი პირობების შემთხვევაში ვაშინგტონში ჩავა და, ამავე დროს, მზადაა, აშშ-ის პრეზიდენტი დონალდ ტრამპი მოსკოვში მიიწვიოს. მანვე დაამატა, რომ ტრამპმა მიწვევის შესახებ უკვე იცის.

"რაც შეეხება შეხვედრას, კარგად ვიცი, რომ პრეზიდენტ ტრამპს სურვილი აქვს, სამომავლო შეხვედრები გაგრძელდეს და ამისთვის მზად ვარ. მაგრამ საჭიროა, რომ შესაბამისი პირობები იყოს", - განაცხადა პუტინმა.

თეთრი სახლის პრესსპიკერმა, სარა სანდერსმა უკვე განაცხადა, რომ პრეზიდენტი მზადაა მოსკოვში ვიზიტით ჩავიდეს მას შემდეგ, რაც ოფიციალურ მოწვევას მიიღებს.

20 ივლისს თეთრი სახლის პრესმდივანმა სარა სანდერსმა დატვიტა, რომ ტრამპმა პუტინი ვაშინგტონში შემოდგომაზე მიიწვია და მისი ორგანიზება ჯონ ბოლტონს დაავალა. რამდენიმე დღის წინ კი ცნობილი გახდა, რომ სამიტმა 2019 წლისთვის გადაინაცვლა და ამის მიზეზი საპრეზიდენტო არჩევნებში კრემლის ჩარევასთან დაკავშირებული გამოძიებაა.

ბოლო შეხვედრა პრეზიდენტებს შორის ჰელსინკიში 16 ივლისს ჩატარდა. შეხვედრას დიდი კრიტიკა მოჰყვა ამერიკაში. ერთობლივ პრესკონფერენციამდე პუტინი და ტრამპი ერთმანეთს პირისპირ თარჯიმნების თანდასწრებით ესაუბრნენ. დღემდე უცნობია რაზე მიმდინარეობდა საუბარი ორ პრეზიდენტს შორის.

სკანდალი მოჰყვა პრესკონფერენციაზე არჩევნებში რუსეთის ჩარევის შესახებ დონალდ ტრამპის პასუხს: "პრეზიდენტი პუტინი ამბობს, რომ ეს არ იყო რუსეთი. მე ვერ ვხედავ, რატომ უნდა ყოფილიყო ის". ამერიკაში დაბრუნების შემდეგ კი მან აღიარა, რომ საუბრისას შეცდომა დაუშვა და რუსეთის ჩარევას არ გამორიცხავს.