თეთრი სახლის პრესმდივანმა, სარა სანდერსმა ტვიტერზე დაწერა, რომ აშშ-ის პრეზიდენტი დონალდ ტრამპი აპირებს, რუსეთის პრეზიდენტი ვლადიმერ პუტინი ვაშინგტონში ამ წლის შემოდგომაზე მიიწვიოს.

"ჰელსინკიში [პრეზიდენტმა] ორივე ქვეყნის უშიშროების საბჭოების წარმომადგენლების მუდმივი სამუშაო დიალოგი შეათანხმა. პრეზიდენტმა ტრამპმა სთხოვა ჯონ ბოლტონს პუტინი ვაშინგტონში შემოდგომაზე მოეწვია, ამ საკითხის განხილვა უკვე დაიწყეს", - დაწერა სარა სანდერსმა.

როგორც BBC-ის რუსული ბიურო წერს, პრეზიდენტის რანგში ვლადიმერ პუტინი აშშ-ში შვიდჯერ არის ნამყოფი და აქედან მხოლოდ სამჯერ ოფიციალური ვიზიტით. ბოლოს ის იყო 2007 წელს, როდესაც პრეზიდენტ ჯორჯ ბუშ უმცროსს შეხვდა.

16 ივლისს ჰელსინკიში აშშ-სა და რუსეთის ლიდერებმა პირისპირ ორ საათზე მეტხანს ისაუბრეს და შემდეგ ერთობლივ პრესკონფერენციაზე ჟურნალისტების კითხვებს უპასუხეს. დონალდ ტრამპის ზედმეტად რბილმა ტონმა და ამერიკული სადაზვერვო სამსახურების მიმართ მისმა უნდობლობამ ამერიკელი სენატორებისა და კონგრესმენების იმედგაცრუება გამოიწვია.

დონალდ ტრამპმა ჰელსინკის შეხვედრის დროს თავდაპირველად განაცხადა, რომ ვერ ხედავდა მიზეზს, რატომ შეიძლება რუსეთი 2016 წლის არჩევნებში ჩარეულიყო. მოგვიანებით კი ამერიკაში დაბრუნებისას თქვა, რომ შეცდომა დაუშვა და საპირისპიროს გულისხმობდა: კერძოდ კი, ფრაზას - "ვერ ვხედავ მიზეზს, რატომ არ ჩაერეოდა რუსეთი არჩევნებში".

CBS-ის ჟურნალისტის კითხვაზე, არის თუ არა პუტინი პასუხისმგებელი არჩევნებში ჩარევაზე, პრეზიდენტმა უპასუხა: "დიახ, არის. როგორც მე ვარ ამ ქვეყანაში მომხდარ მოვლენებზე პასუხისმგებელი, ისევე არის პუტინიც რუსეთთან დაკავშირებით. როგორც ქვეყნის ლიდერს, სწორედ მას ვაკისრებ პასუხისმგებლობას".

ეს პირველი შემთხვევაა, როცა დონალდ ტრამპმა ღიად დაადასტურა აშშ-ის საარჩევნო პროცესში რუსეთის კვალის არსებობა.