თავდაცვის მინისტრის, ლევან იზორიას თქმით, სამინისტროს ტენდერი, რომელშიც პეტრე დევრიშაძის კომპანია მონაწილეობდა ჩაიშალა, რადგან ტენდერში მონაწილე სხვა კომპანიამ შესყიდვების სააგენტოს საჩივრით მიმართა.

იზორიას განმარტებით, გასაჩივრის საფუძველზე სააგენტომ მიიღო გადაწყვეტილება, რომ ტენდერი ხელახლა ჩატარებულიყო.

"ეს წინ უსწრებს დევრიშაძის მიერ ტენდერში მონაწილეობის ფაქტის საჯაროდ გაშუქებასა და გამჟღავნებას. შესაბამისად, ამ რეკომენდაციის საფუძველზე ჩვენ ტენდერი ჩავშალეთ", - განაცხადა მინისტრმა.

სტუდია მონიტორის ჟურნალისტური გამოძიების მიხედვით, პეტრე დერვიშაძე, პირი, რომელმაც რუსეთის სპეცსამსახურებთან თანამშრომლობა აღიარა, საქართველოში შინაგან საქმეთა სამინისტროსა და თავდაცვის სამინისტროს მიერ გამოცხადებულ ტენდერებს იგებს. მისმა კომპანიებმა ჯამში 4 100 000 ლარის ღირებულების ტენდერები მოიგეს.

ამის შესახებ სიუჟეტი ტელეკომპანია რუსთავი 2-ზე, შაბათის კურიერშიც გავიდა, სადაც ნათქვამია, რომ დევრიშაძემ, თავდაცვის სამინისტროს ეკიპირების გარდა, კომპიუტერული ტექნიკაც მიჰყიდა.

თავდაცვის სამინისტრომ რუსეთის სპეცსამსახურებთან კავშირში მყოფი პირის მიერ ტენდერებში გამარჯვებაზე განმარტა, რომ ღია ტენდერში მონაწილეთა წარსულის შესახებ ინფორმაციას არ ფლობენ. სამინისტრო განმარტავს, რომ მათ კანონით არ ეძლევათ შესაძლებლობა, ტენდერში მონაწილე კომპანიას დაუწესონ რაიმე შეზღუდვა.