თავდაცვის სამინისტრო რუსეთის სპეცსამსახურებთან კავშირში მყოფი პირის მიერ ტენდერებში გამარჯვებას განცხადებით ეხმაურება. სამინისტრო განმარტავს, რომ გამოცხადებულ ღია ტენდერში მონაწილე კომპანიებისა და მისი დამფუძნებლების წარსული საქმიანობის შესახებ ინფორმაციას არ ფლობენ. მათივე განცხადებით, ტენდერში გამარჯვებულის ვინაობა მხოლოდ ელექტრონული ფარული პროცედურების დასრულების შემდეგ ხდება ცნობილი.

"შპს მარგიო თავდაცვის სამინისტროს მიერ გამოცხადებულ კანონმდებლობით გათვალისწინებულ ელექტრონულ, ღია ტენდერებში 2013 წლიდან მონაწილეობს. სატენდერო პროცედურების გამჭვირვალობის მაღალი ხარისხის უზრუნველსაყოფად, ღია ელექტრონულ ტენდერში მონაწილე კომპანიების ვინაობა არის ფარული", - ნათქვამია თავდაცვის სამინისტროს განცხადებაში.

თავდაცვის უწყება კანონმდებლობას იშველიებს, რომლის თანახმად, ელექტრონულ ღია ტენდერში მონაწილეობის უფლება აქვს ყველა კომპანიას, რომელიც აკმაყოფილებს სახელმწიფო შესყიდვების შესახებ კანონმდებლობის მოთხოვნებს.

სამინისტრო განმარტავს, რომ მათ კანონით არ ეძლევათ შესაძლებლობა, რომ ტენდერში მონაწილე კომპანიას დაუწესონ რაიმე შეზღუდვა, ან დაინტერესდეს კომპანიის დირექტორის/დამფუძნებლის ნასამართლეობის ან წარსული ცხოვრების/ წარსული საქმიანობის შესახებ.

თავდაცვის სამინისტროს ცნობით, შპს მარგიოს არ აქვს უფლება მონაწილეობა მიიღოს უწყების მიერ გამოცხადებულ საიდუმლო შესყიდვებში:

"ამ ტიპის შესყიდვების განსახორციელებლად, სახელმწიფო საიდუმლოების მაქსიმალურად დაცვის და უზრუნველყოფის აუცილებლობიდან გამომდინარე, კომპანია უნდა ფლობდეს საიდუმლო დაშვების ნებართვას, სახელმწიფო საიდუმლოების შესახებ კანონის მე-19 მუხლის შესაბამისად, რაც შპს მარგიოს არ გააჩნია და შესაბამისად ის ასეთი ტიპის შესყიდვებში მონაწილეობას ვერ მიიღებდა".

სამინისტრო უარყოფს, რომ შპს მარგიო შეიარაღებულ ძალებს კომპიუტერული ტექნიკით ამარაგებს:

"ხაზგასმით აღვნიშნავთ, რომ ამ კომპანიისგან მოხდა მხოლოდ ერთი კომპიუტერის ვიდეობარათის შესყიდვა, ლევან იზორიას მინისტრად დანიშვნამდე, 2016 წლის 11 აპრილს. ხელშეკრულების ღირებულება იყო 3 200 ლარი. აქვე მოგახსენებთ, რომ ნებისმიერი კომპიუტერული ტექნიკა, ექსპლუატაციაში გაშვებამდე და მის შემდეგაც, უსაფრთხოების ზომების მაქსიმალური დაცვის მიზნით, რეგულარულად მოწმდება და კონტროლდება".

უწყების ცნობითვე, მეორე კომპანიას, შპს გლობალ თრეიდ გუპს ერთადერთი მიწოდება აქვს განხორციელებული 2017 წლის ნოემბერში, რომელიც 14 981 ლარის ღირებულების, სამედიცინო დანიშნულების ნემსების შეძენას ეხება.

სტუდია მონიტორის ჟურნალისტური გამოძიების მიხედვით, პეტრე დერვიშაძე, პირი, რომელმაც რუსეთის სპეცსამსახურებთან თანამშრომლობა აღიარა, საქართველოში შინაგან საქმეთა სამინისტროსა და თავდაცვის სამინისტროს მიერ გამოცხადებულ ტენდერებს იგებს. ამის შესახებ სიუჟეტი ტელეკომპანია რუსთავი 2-ზე, შაბათის კურიერშიც გავიდა, სადაც ნათქვამია, რომ დევრიშაძემ, თავდაცვის სამინისტროს ეკიპირების გარდა, კომპიუტერული ტექნიკაც მიჰყიდა.