თავდაცვის სამინისტრო მაღალყელიან სამხედრო ფეხსაცმელზე გამოცხადებულ ტენდერს, რომელშიც რუსეთის სპეცსამსახურებთან კავშირში მყოფი პეტრე დევრიშაძის კომპანია მონაწილეობდა, აუქმებს. ამის შესახებ ინფორმაცია On.ge-ს უწყებაში დაუდასტურეს.

მათივე ცნობით, გადაწყვეტილება თავდაცვის სამინისტრომ დავების საბჭოს გადაწყვეტილების საფუძველზე მიიღო:

"გამოცხადდება ახალი ტენდერი უკვე გადასინჯული და გადახედილი პირობებით".

მანამდე, თავდაცვის სამინისტრომ რუსეთის სპეცსამსახურებთან კავშირში მყოფი პირის მიერ ტენდერებში გამარჯვებაზე განმარტა, რომ ღია ტენდერში მონაწილეთა წარსულის შესახებ ინფორმაციას არ ფლობენ. სამინისტრო განმარტავს, რომ მათ კანონით არ ეძლევათ შესაძლებლობა, ტენდერში მონაწილე კომპანიას დაუწესონ რაიმე შეზღუდვა.

სტუდია მონიტორის ჟურნალისტური გამოძიების მიხედვით, პეტრე დერვიშაძე, პირი, რომელმაც რუსეთის სპეცსამსახურებთან თანამშრომლობა აღიარა, საქართველოში შინაგან საქმეთა სამინისტროსა და თავდაცვის სამინისტროს მიერ გამოცხადებულ ტენდერებს იგებს. მისმა კომპანიებმა ჯამში 4 100 000 ლარის ღირებულების ტენდერები მოიგეს.

ამის შესახებ სიუჟეტი ტელეკომპანია რუსთავი 2-ზე, შაბათის კურიერშიც გავიდა, სადაც ნათქვამია, რომ დევრიშაძემ, თავდაცვის სამინისტროს ეკიპირების გარდა, კომპიუტერული ტექნიკაც მიჰყიდა.