საპარლამენტო უმრავლესობის სხდომა, რომელიც შიდაპარტიული დაპირისპირების შემდეგ ჩაინიშნა, გადაიდო. სავარაუდოდ, სხდომა გაფართოებული ფორმატით შაბათს ჩატარდება და მას ქართული ოცნების თავმჯდომარე, პრემიერ-მინისტრი გიორგი კვირიკაშვილი დაესწრება.

უმრავლესობის წევრის, ბიძინა გეგიძის თქმით, სხვა დეპუტატებთან ერთად ის ერთ-ერთი იყო, ვინც სხდომის გადადების ინიციატივით გამოვიდა.

"ეს შეხვედრა გაცილებით სოლიდურ, გაცილებით მეტ დროს მოითხოვს მომზადებისთვის, რადგან ამ შეხვედრაზე ბევრი პრობლემატური და ბევრი აქტუალური საკითხის განხილვა უნდა მოხდეს", - განაცხადა გეგიძემ.

გედევა ფოფოხაძის განმარტებით, უმრავლესობის სხდომაში ბიძინა ივანიშვილის მონაწილეობა სწორი არ იქნება:

"ზოგადად, პოლიტიკურ პროცესში მის მონაწილეობას, რა თქმა უნდა, ყველანაირად მხარს ვუჭერ და მგონია, რომ სწორი იქნება, მაგრამ უმრავლესობის სხდომაში რამდენად სწორი იქნება მისი მონაწილეობა, ვერფარეს გეტყვით".

ქართული ოცნების წევრის, ნუკრი ქანთარიას თქმით უმრავლესობის სხდომაზე დასჯაზე საუბარი არ იქნება:

"ლაპარკია იმაზე, რომ მოვნახოთ ის წერტილი, რომელიც არის შეთანხმების და გამოადგება ჩვენს ქვეყანას და არ ვაზარალოთ, აი, ამ ჩვენი გარკვეული უთანხმოებით".

ქართული ოცნების შიგნით არსებულ დაპირისპირებაზე საჯაროდ საუბარი მას შემდეგ დაიწყო, რაც საზოგადოებრივი მაუწყებლობის სამეურვეო საბჭოს მეურვედ ნინია კაკაბაძის კანდიდატურის მხარდაჭერის გამო გედევან ფოფხაძემ უმრავლესობის დატოვება გადაწყვიტა.

პარლამენტის თავმჯდომარემ, ირაკლი კობახიძემ განცხადა, იმ დეპუტატებს, რომლებიც ქართულ ოცნებაში არსებულ დაპირისპირებაზე ღიად ლაპარაკობენ, თანამშრომლობის გაგრძელების მიზნით წინაპირობებს წაუყენებენ. კობახიძის თქმით, წინაპირობები დისციპლინის საკითხებს უკავშირება. მისი განმარტებით, გაიწერება კონკრეტული წესები, რომელსაც შესაბამისი რეაგირების მექანიზმი მიემაგრება.

გაიგეთ მეტი: