ქართული ოცნების დეპუტატი დავით ჭიჭინაძე პარლამენტის თავმჯდომარის ირაკლი კობახიძის ინიციატივას პარტიაში დისციპლინის გამკაცრების შესახებ არ ეთანხმება.

"თუ ჩვენი ქცევა ეწინააღმდეგება ჩვენი ამომრჩევლის ინტერესებს, ვერანაირი საბუთი ვერ დამავალდებულებს მე, რომ ამ წესებს დავემორჩილო", - განუცხადა ჟურნალისტებს დეპუტატმა.

მან ირაკლი კობახიძეს კონსტიტუციის პროექტის სახალხო განხილვები გაახსენა.

"ფილარმონიიდან რომ გარბის კითხვებიდან გამომდინარე, რა ვქნათ საზოგადოებასაც ავუკრძალოთ კითხვების დასმა?.. ორი დღეა ვიძახით, რომ განცხადებები არ ვაკეთოთ და მე ვუსმენ, რომ ამძაფრებენ და ამძაფრებენ და იძახიან დისციპლინას", - ამბობს დავით ჭიჭინაძე.

დავით ჭიჭინაძის თქმით, იმ ადამიანებს, რომელსაც გააჩნდა მის მიმართ კითხვები, მან მიაყენა შეურაცხყოფა, მიატოვა თავისი თანაგუნდელები სცენაზე და წავიდა.

საქართველოს პარლამენტის თავმჯდომარის ირაკლი კობახიძის განცხადებით, იმ დეპუტატებს, რომლებიც ქართულ ოცნებაში არსებულ დაპირისპირებაზე ღიად ლაპარაკობენ, თანამშრომლობის გაგრძელების მიზნით წინაპირობებს წაუყენებენ.

ქართული ოცნების შიგნით არსებულ დაპირისპირებაზე საჯაროდ საუბარი მას შემდეგ დაიწყო, რაც საზოგადოებრივი მაუწყებლობის სამეურვეო საბჭოს მეურვედ ნინია კაკაბაძის კანდიდატურის მხარდაჭერის გამო გედევან ფოფხაძემ უმრავლესობის დატოვება გადაწყვიტა.

პარლამენტის თავმჯდომარის განცხადებით, რელიგიური თემის სპეკულირების ფონზე, "გედი ფოფხაძემ საკმაოდ მძიმე შეურაცხყოფა მიაყენა თავის თანაგუნდელებს". ქანთარიამ განაცხადა, რომ თავმჯდომარის განცხადებები ავტორიტარიზმის ნიშნებს შეიცავს.