საქართველოს მთავრობა ვიზალიბერალიზაციასთან დაკავშირებულ გამოწვევებთან გამკლავების მიზნით, ზომების გამკაცრებას გეგმავს, - ამ თემაზე დღეს საქართველოს პრემიერ-მინისტრმა გიორგი კვირიკაშვილმა საგანგებო თათბირი გამართა.

მთავრობის ადმინისტრაციის ცნობით, თათბირზე განიხილეს ის ნაბიჯები, რომელთა გადადგმა უმოკლეს ვადებში იგეგმება, რათა ევროკავშირის ქვეყნებში თავშესაფრის მაძიებელთა რაოდენობა კიდევ უფრო არ გაიზარდოს და ეს ვიზალიბერალიზაციის შეფერხების მიზეზი არ გახდეს.

საუბარია საკანონმდებლო ცვლილებების ინიცირებაზე, რომელთა შედეგად პრევენციულ ზომებს შემოიღებენ, მათ შორის ისეთს, როგორიცაა რეადმისიის ხარჯის თავად რეადმისირებულ პირებზე დაეკისრება. ასევე, დაგეგმილია გვარის შეცვლასთან დაკავშირებული პროცედურების გამკაცრება და ა.შ. აღნიშნული ცვლილებები მთავრობის უახლოეს სხდომაზე იქნება წარდგენილი.

უწყების ცნობით, შინაგან საქმეთა სამინისტრო კიდევ უფრო გააძლიერებს ორმხრივი თანამშრომლობის ფორმატებს პარტნიორ ქვეყნებთან, განსაკუთრებით ორგანიზებული დანაშაულის წინააღმდეგ ერთობლივი ბრძოლის კონტექსტში. გარდა ამისა, შედგება შინაგან საქმეთა მინისტრი ეწვევა ევროკავშირის რამდენიმე ქვეყანაა, რათა კიდევ უფრო გააქტიურდეს პოლიციის ატაშეების ინსტიტუტი.

მთავრობის გეგმით, მთელი ქვეყნის მასშტაბით ჩატარდება აქტიური საინფორმაციო კამპანია, რომელიც მოსახლეობას მიაწვდის დეტალურ ინფორმაციას, რა რისკებთან არის დაკავშირებული მათ მიერ შენგენის ზონაში უვიზო მიმოსვლის წესების დარღვევა და რა შედეგებს მოუტანს ეს მათ, სხვადასხვა, მათ შორის ფინანსური თვალსაზრისით.

თათბირს ესწრებოდნენ ვიცე-პრემიერები, საგარეო საქმეთა მინისტრი მიხეილ ჯანელიძე და შინაგან საქმეთა მინისტრი გიორგი გახარია, იუსტიციის მინისტრი თეა წულუკიანი, მთავარი პროკურორი ირაკლი შოთაძე და სახელმწიფო უსაფრთხოების სამსახურის უფროსი ვახტანგ გომელაური მონაწილეობდნენ.

გერმანიის საზოგადოებრივი მაუწყებლის ინფორმაციით, გაზრდილი კრიმინალის მიზეზით, გერმანიის ჩრდილოეთ რაინ-ვესტფალიის მთავრობას სურს, რომ საქართველოს მოქალაქეებს უვიზო რეჟიმი შეეზღუდოთ.

WDR-ის ცნობით, რეგიონი იზრუნებს იმაზე, რომ გერმანიის ყველა მიწაზე, საქართველოს მოქალაქეებისთვის უვიზო მიმოსვლა შეწყდეს. გამოცემის ცნობით, ამის მიზეზი ის პრობლემებია, რასაც მათივე თქმით, თავშესაფრის მაძიებელი საქართველოს მოქალაქეები ქმნიან. კერძოდ, პრობლემები შეიქმნა ლტოლვილთა საცხოვრებელში ოერლინგაუსენში.

თავშესაფრის მინიჭების ევროპული სააგენტოს (EASO) სტატისტიკით, 2016 წელთან შედარებით, 2017 წელს ევროკავშირის წევრ ქვეყნებში თავშესაფრის მაძიებელი საქართველოს მოქალაქეების რიცხვი 35 პროცენტით გაიზარდა.