თბილისის მე-18 საერთაშორისო კინოფესტივალი დიდ ყურადღებას უთმობს ქართული კინოს სიახლეებს და ყოველწლიურად, ქართველ და უცხოელ მაყურებელს სექციაში ქართული პანორამა უახლეს ქართულ მხატვრულ, დოკუმენტურ და ანიმაციურ ფილმებს წარუდგენს.

წარმოგიდგენთ იმ დოკუმენტურ ფილმებს, რომლებსაც ქართულ პანორამაში უჩვენებენ:

გოგიტას ახალი ცხოვრება - ლევან კოღუაშვილი, 2016

ხანგრძლივი პატიმრობის შემდეგ, თავის სოფელში დაბრუნებული გოგიტა, ახალი ცხოვრების დაწყებას ცდილობს. მას ყველაზე მეტად ცოლის მოყვანა უნდა. მაგრამ ვინ ისურვებს ნასამართლევი, ღარიბი ფერმერის ცოლობას, რომელიც ისევ დედასთან ერთად ცხოვრობს? ის ინტერნეტით გაიცნობს მაკას, რომელიც არც ისე ახალგაზრდაა, არც ულამაზესია, მაგრამ ძალიან გემრიელ ნამცხვრებს აცხობს. ისე რომ ჯერ არც კი შეხვედრილან, ისინი დაქორწინებას გადაწყვეტენ.

დაწესებულება #16 - ალექსანდრე ქორიძე, 2017

ახალი ციხე რუსთავში საუკეთესო პენიტენციურ დაწესებულებად ითვლება მთელს პოსტ-საბჭოთა სივრცეში. მაგრამ საუკეთესო ციხეც ვერ შეაჩერებს ადამიანის ბუნებრივ სურვილს - იყო თავისუფალი.

დევნილი გემი ენგური - ვახტანგ ვარაზმა, 2016

ბათუმი საქართველოს ტურისტული ცენტრია. ყოველდღიურად ადგილობრივები და ტურისტები ხედავენ, თუ როგორ შემოდიან და გადიან გემები ბათუმის პორტიდან. პორტში დგას ერთი გემი ენგური, თავისი ორკაციანი ეკიპაჟით. გემი არასდროს ტოვებს პორტის ტერიტორიას. ლადო გემის კაპიტანია, ვახო კი - ბოცმანი, ისინი არასდროს ტოვებენ დაზიანებულ გემს, გემზე არიან ზამთარშიც და ზაფხულშიც, მზიან თუ შტორმიან ამინდში. გემი, ლადო და ვახო აფხაზეთიდან დევნილები არიან.

დიდუბე, ბოლო გაჩერება - შორენა თევზაძე, 2017

ყველაზე გადატვირთულ სადგურზე პატარა, წყნარი ვეტერინარული მაღაზიაა, სადაც სიჩუმეს მხოლოდ გარედან შემოსული ხმაური არღვევს. მაღაზიის მფლობელი ნიკო, შუშის დახლის უკან ზის თავის ცოლთან, ციცოსთან ერთად. ის პოეზიას წერს მიმდინარე მოვლენებზე. ფილმი აჩვენებს, როგორი მიჯაჭვულია ნიკო თავის ადგილს. თუმცა, რაც დრო გადის, ნიკოს პატარა სამეფო დასასრულს უახლოვდება. ვინ იცის, იქნებ ნიკოსთვის ეს დასასრული ახალი ხანის დასაწყისია.

მზის ქალაქი - რატი ონელი, 2017

ფილმი პოსტაპოკალიპტური ქალაქი-აჩრდილის, ჭიათურისა და მისი რამდენიმე მცხოვრების სიურეალისტურ ხედვას წარმოადგენს. ამ გმირების ცხოვრება, ბედი და ოცნებები იმ ადგილის ნანგრევების ფონზე ვითარდება, რომელიც ოდესღაც ცნობილი იყო თავისი არქიტექტურული და ტექნოლოგიური მიღწევებით და განსაკუთრებით - მანგანუმის შახტით.

სოვდაგარი - თამთა გაბრიჩიძე, 2016

გელა საყოფაცხოვრებო ნივთებსა და მეორად ტანსაცმელს ძველი მიკროავტობუსის საბარგულიდან ყიდის. ის ვაჭრობს ადგილებში, სადაც ფულზე მეტად კარტოფილი ფასობს.

თბილისის მე-18 საერთშორისო კინოფესტივალი წელს 4 დეკემბერს დაიწყება და 10 დეკემბრის ჩათვლით გაგრძელდება.

გაიგეთ მეტი: