4 დეკემბერს, კინოთეატრ ამირანში თბილისის მე-18 საერთაშორისო კინოფესტივალი უნგრელი რეჟისორის ილდიკო ენიედის ფილმით სულისა და სხეულის შესახებ გაიხსნება.

უნგრელი რეჟისორის ილდიკო ენიედის 2017 წლის ფილმი ბერლინის საერთაშორისო კინოფესტივალზე ფიპრესის, ეკუმენიკური ჟიურის და ფესტივალის მთავარი ჯილდოს - ოქროს დათვის მფლობელი გახდა. ფილმმა ასევე გაიმარჯვა სიდნეის საერთაშორისო კინოფესტივალზე საუკეთესო ფილმის ნომინაციაში. გარდა ამისა, სულისა და სხეულის შესახებ ევროპული კინოაკადემიის ჯილდოს მფლობელია და უნგრეთის სახელით ოსკარზეა გაგზავნილი საუკეთესო უცხოენოვანი ფილმის ნომინაციაზე წარსადგენად.

ფილმის სიუჟეტი ბუდაპეშტის ხორცკომბინატში ვითარდება. ფილმის მთავარი გმირები მისი თანამშრომლები - ენდრე და მარია არიან. ენდრე, ხორცკომბინატის ფინანსური დირექტორი, შუა ხნის, მარტოსული მამაკაცია. მარია კი, ქერა, სიტყვაძუნწი პერფექციონისტია - ხორცის ხარისხის ინსპექტორი. ერთი შეხედვით მათ არც არაფერი აკავშირებთ, თუმცა სინამდვილეში ყველაფერი სხვაგვარადაა.

კომპანიაში რუტინული ინტერვიუს დროს, ფსიქოლოგი აღმოაჩენს, რომ მარიას და ენდრეს ერთნაირი პერიოდული სიზმრები აქვთ. ისინი გაოცებული არიან, რადგან ამ ორმა ინტროვერტმა ადამიანმა არაფერი იცის ერთმანეთის შესახებ. მეორე დღეს ისევ ამოწმებენ და მათ ისევ ერთი და იგივე სიზმარი ესიზმრათ წინა ღამეს. ისინი ისევ და ისევ ადარებენ საკუთარ სიზმრებს და თანდათან ცხადი ხდება, რომ ერთმანეთს საერთო სივრცეში ხვდებიან: მშვიდ, თოვლიან ტყეში, სადაც ლამაზ ირმებად გარდაიქმნებიან და ერთმანეთს, ნაზად ეტრფიან.

"ფილმის ხერხემალს დაქუცმაცებული სიყვარულის ისტორია წარმოადგენს, ამის უკან, ჩვენი, ყოველდღიური სამყაროა. ვფიქრობთ, რომ კარგად ვიცნობთ მას. სახლი, ქალაქი, სამუშაო ადგილი, ჩვენი თავისუფალი დრო - ესაა ის, რაშიც ყოველდღიურ რუტინაში ვეფლობით. და ოცნებები? ენდრე და მარიას საერთო სიზმრების სამყარო ჰაეროვანი, ბუნებრივი და თავისუფალი ემოციებითაა გაჟღენთილი. ესაა ადგილი, სადაც ჩვენ, საკუთარი თავის შეცნობა შეგვიძლია", - ამბობს ფილმის რეჟისორი ილდიკო ენიედი.

რაც შეეხება რეჟისორს, ილდიკო ენიედიმ კარიერა დაიწყო როგორც კონცეპტუალურმა და მედია არტისტმა. 1999 წელს გადაღებულმა მისმა მხატვრულმა ფილმმა Simon, the Magician ლოკარნოს კინოფესტივალზე ჟიურის სპეციალური პრიზი მოიპოვა, ხოლო ფილმმა ტამაში და იული (1997) ბელფორტის კინოფესტივალზე გრან-პრი დაიმსახურა. მას შემდეგ, ენიედიმ რამოდენიმე სატელევიზიო და მოკლემეტრაჟიანი ფილმი გადაიღო. სულისა და სხეულის შესახებ 18 წლიანი პაუზის შემდეგ მისი პირველი სრულმეტრაჟიანი ფილმია.

თბილისის მე-18 საერთშორისო კინოფესტივალი წელს 4 დეკემბერს დაიწყება და 10 დეკემბრის ჩათვლით გაგრძელდება.

გაიგეთ მეტი: