ადამიანის უფლებათა საკითხებში ევროსაბჭოს კომისარმა ნილ მუიჟნიეკსმა სახალხო დამცველის, უჩა ნანუაშვილის მიმართ იუსტიციის მინისტრის მიერ გაკეთებული შეფასება დაგმო და მსგავსი განცხადებებისგან თავის შეკავებისკენ მოუწოდა. ამის შესახებ წერს FrontNews International.

"შეშფოთებული ვარ იმით, რომ მსგავსმა სიტყვიერმა დაპირისპირებამ შესაძლოა ზიანი მიაყენოს საკმაოდ მნიშვნელოვანი ინსტიტუტის ეფექტურობას. როგორც ყველა ომბუდსმენის მსგავსად, სახალხო დამცველმა უნდა იმოქმედოს ადამიანის უფლებების დასაცავად, შეამოწმოს მთავრობების ძალაუფლება და მმართველობის ხარისხის გაუმჯობესებაზე იზრუნოს. აქედან გამომდინარე, მისი მთავარი ფუნქციაა კანონმდებლობაში ხარვეზების გამოვლენა და ანგარიშებში ამის ასახვა", - ნათქვამია კომისრის განცხადებაში.

კომისრის თქმით, ხელისუფლება შესაძლოა ხშირად არ ეთანხმებოდეს სახალხო დამცველის კრიტიკას და მნიშვნელოვანია, რომ ომბუდსმენმა თავისი ამოცანების შესრულება შეუფერხებლად განაგრძოს:

"ამ მიზეზის გამო სახალხო დამცველის ინსტიტუტზე მსგავსი თავდასხმა მიუღებლად მიმაჩნია. მოვუწოდებ ყველა საჯარო პირს, ვინც ჩართულია დებატებში, თავი შეიკავოს იმ განცხადებებისგან, რომელსაც სახალხო დამცველის რეპუტაციისთვის ზიანის მიყენება შეუძლია ან, შეიძლება, მის საქმიანობაზე იქონიოს გავლენა".

სახალხო დამცველის მიმართ გამოთქმული კრიტიკა

გუშინ, 16 ნოემბერს, იუსტიციის მინისტრმა თეა წულუკიანმა განაცხადა, რომ სახალხო დამცველი, უჩა ნანუაშვილი საქართველოს პირველი უსამართლო ომბუდსმენია. მან ომბუდსმენის საქმიანობა ე.წ. ციანიდის საქმის ანგარიშის გამოქვეყნების შემდეგ შეაფასა.

სახალხო დამცველის ე.წ. ციანიდის საქმის მონიტრინგის ანგარიშში ნათქვამია, რომ სასამართლო სხდომები არსებითი ხარვეზების გარეშე წარიმართა, თუმცა გამოძიების პროცესში დაშვებულმა დარღვევებმა სასამართლოს საბოლოო გადაწყვეტილებაზე გადამწყვეტი გავლენა იქონია.

მმართველი პარტიისა და პარლამენტში საგარეო საქმეთა კომიტეტის წევრის, შოთა შალელაშვილის თქმით, "ასეთი უპასუხისმგებლო" განცხადება, როგორიც წულუკიანმა გააკეთა, ქართული ოცნების არც ერთ ლიდერს გაუკეთებია. საპარლამენტო უმრავლესობიდან ის ერთადერთი დეპუტატია, ვინც მინისტრი მისი შეფასების გამო გააკრიტიკა.

იუსტიციის მინისტრის შემდეგ სახალხო დამცველი ჯანდაცვის მინისტრმაც, დავით სერგეენკომაც გააკრიტიკა. მისი თქმით, არავის აქვს უფლება ეჭვი შეიტანოს სასამართლოს გადაწყვეტილებაში. მისივე თქმით, ის უერთდება იუსტიციის მინისტრის განცხადებას.

შალელაშვილის განცხადებაზე პარლამენტის თავმჯდომარემ ირაკლი კობახიძემ განმარტა, რომ აზრთა სხვადასხვაობა ჯერ გუნდის შიგნით უნდა გაირკვეს და ამის შემდეგ უნდა გაკეთდეს გარეთ განცხადებები. მისივე თქმით, თეა წულუკიანს აქვს იმის მორალური უფლება, რომ სახალხო დამცველის საქმიანობა შეაფასოს.

ომბუდსმენის მიმართ გამოთქმულ კრიტიკას გამოეხმაურნენ არასამთავრობო ორგანიზაციები. მათივე განმარტებით, მონიტორინგის დასკვნაში სახალხო დამცველი ეხმაურება ყველა იმ არსებით დარღვევას, რასაც როგორც გამოძიების ეტაპზე, ისე სასამართლო პროცესის მიმდინარეობისას არასამთავრობო ორგანიზაციებიც აღნიშნავდნენ და უარყოფითად აფასებდნენ.

მათივე განმარტებით, ეს პირველი შემთხვევა არ არის, როდესაც ხელისუფლების მაღალი თანამდებობის პირები სახალხო დამცველს თავს ესხმიან და კრიტიკული პოზიციის გამოხატვის გამო აკრიტიკებენ.