უმრავლესობის წევრი შოთა შალელაშვილი იუსტიციის მინისტრის, თეა წულუკიანის მიერ ომბუდსმენის შეფასებას გამოეხმაურა და განაცხადა, რომ "ასეთი უპასუხისმგებლო" განცხადება ქართული ოცნების არც ერთ ლიდერს გაუკეთებია. საქართველოს თეა წულუკიანმა განაცხადა, რომ სახალხო დამცველი, უჩა ნანუაშვილი საქართველოს პირველი უსამართლო ომბუდსმენია.

საგარეო ურთიერთობათა კომიტეტის წევრი ფესბუკზე წერს, რომ მინისტრის განცხადება პოლიტიკური და სამართლებრივი თვალსაზრისით გაუმართლებელი ნაბიჯია:

"[განცხადებას] მთლიანად ვემიჯნები და ვეხმაურები იმ მოტივაციით, რომ მომავალში არც ერთი ჩინოვნიკი აღარ მისცემს თავს უფლებას, მსგავსი უპასუხისმგებლო შეფასებები გამოხატოს, ქვეყნის ერთ-ერთი ყველაზე მნიშვნელოვანი კონსტიტუციური ინსტიტუციის მისამართით".

პარლამენტარი განმარტავს, რომ 2012 წელს ქართული ოცნების ხელისუფლების პირობებში პარლამენტმა 88 ხმით მხარი დაუჭირა მოქმედ ომბუდსმენის კანდიდატურას. მისივე თქმით, მმართველი პარტია იყო ერთადერთი პოლიტიკური ძალა, რომელმაც ადამიანის უფლებები აღიარა და სახელმწიფო ინტერესებიდან გამომდინარე "მსგავს უსამართლობაზე" თვალის დახუჭვას არ აპირებს"

"ყოველთვის, ყურადღებით ვადევნებ თვალს ომბუდსმენის საქმიანობას და ანგარიშს, ასევე მისასალმებელი ფაქტია, რომ არცერთი საერთაშორისო ან/და ადგილობრივი ავტორიტეტული ორგანიზაციიდან არ გაჩენილა პრეტენზიები მისი მისამართით", - ნათქვამია შალელაშვილის განცხადებაში.

თეა წულუკიანმა უჩა ნანუაშვილის საქმიანობა ე.წ. ციანიდის საქმის ანგარიშის გამოქვეყნების შემდეგ შეაფასა. სახალხო დამცველის მონიტორინგის ანგარიშში ნათქვამია, რომ გამოძიების პროცესში დაშვებულმა დარღვევებმა სასამართლოს საბოლოო გადაწყვეტილებაზე გადამწყვეტი გავლენა იქონია.