რუსეთის საგარეო საქმეთა მინისტრმა სერგეი ლავროვმა თქვა, რომ ვლადიმერ პუტინი მზადაა აშშ-ს პრეზიდენტ დონალდ ტრამპთან შესახვედრად. ინფორმაციას აღნიშნულის შესახებ რუსული სახელმწიფო საინფორმაციო სააგენტო Ria ავრცელებს.

"ჩვენ გავიგეთ ტრამპის განცხადების შესახებ, რომლის მიხედვითაც, ის გეგმავს მსგავს შეხვედრას პრეზიდენტ პუტინთან. პროტოკოლის სამსახურები კონტაქტზე არიან და როდესაც ორივე პრეზიდენტის გრაფიკი გარკვეული იქნება, ვფიქრობ, ამის შესახებ გაცნობებთ", - უთხრა ჟურნალისტებს სერგეი ლავროვმა.

ლავროვის თქმით, ვლადიმერ პუტინი დონალდ ტრამპს, შესაძლოა, ვიეტნამში შეხვდეს, სადაც 2017 წლის 10-11 ნოემბერს აზია-წყნარი ოკეანის ეკონომიკური თანამშრომლობის ფორუმი იმართება.

გარდა ამისა, რუსეთის საგარეო საქმეთა მინისტრმა დააანონსა თავისი შეხვედრა აშშ-ს სახელმწიფო მდივან რექს ტილერსონთან. ლავროვის თქმით, ტილერსონთან საუბარი შეეხება ჩრდილოეთ კორეის, ისრაელ-პალესტინის, სირიისა და უკრაინის საკითხებს.