1997-დან 2010 წლამდე დაბადებული თაობა ისტორიაში პირველი აღმოჩნდა, რომელმაც სკოლაში წინა თაობაზე უარესი შედეგები აჩვენა, ამის შესახებ წამყვანი ნეირომეცნიერი აცხადებს.

"ეს არის თანამედროვე ისტორიაში პირველი თაობა, რომელმაც სტანდარტიზებულ აკადემიურ ტესტებში წინამორბედზე დაბალი ქულები მიიღო", — უთხრა 43 წლის დოქტორმა ჯარედ კუნი ჰორვათმა The New York Post-ს, — "და რაც უფრო ცუდია, ამ ახალგაზრდების უმეტესობა საკუთარი გონიერების შესახებ ზედმეტად თავდაჯერებულია. რაც უფრო ჭკვიანები ჰგონიათ თავი, რეალურად მით უფრო ნაკლებად ჭკვიანები არიან. მათ პრაქტიკულად ყველა კოგნიტურ მაჩვენებელში დაბალი შედეგი აჩვენეს, დაწყებული ყურადღების უნარით, მეხსიერებით, წიგნიერებით, მათემატიკური უნარებით, აღმასრულებელი ფუნქციებით და საერთო IQ-ით".

ჰორვათი ცოტა ხნის წინ კონგრესშიც გამოვიდა და კანონმდებლებთან განაცხადა, რომ Gen Z-მ, რომელმაც მილენიალები შეცვალა, კაცობრიობის აკადემიური პროგრესის ხაზი "ააფეთქა", ოღონდ უარყოფითი მიმართულებით.

რა მოხდა ისეთი, რომ მთელმა თაობამ ტესტებში ასეთი ჩავარდნა განიცადა?

ჰორვათმა, რომელმაც სტანდარტიზებული ტესტების დიდი მოცულობის მონაცემები შეისწავლა, კონგრესს უთხრა, რომ Gen Z-ის სირთულეები უკავშირდება იმას, რომ ისინი პირველი თაობაა, რომელიც მუდმივი ეკრანის გარემოში გაიზარდა. და ეს რეალური სწავლის შემცვლელი არ არის.

"მოზარდი დროის ნახევარზე მეტს ეკრანის ყურებაში ატარებს", — თქვა ჰორვათმა, რომელიც მსოფლიოს სხვადასხვა უნივერსიტეტში ასწავლიდა, მათ შორის ჰარვარდსა და მელბურნის უნივერსიტეტში — "ადამიანები ბიოლოგიურად ისე ვართ დაპროგრამებული, რომ ვსწავლობთ სხვა ადამიანებისგან და სიღრმისეული შესწავლის გზით, არა ეკრანზე სწრაფი, წერტილოვანი შეჯამებების თვალიერებით".

გაკვეთილებსა და საშინაო დავალებაში ტვინის რესურსის დიდ ნაწილს იკავებს ციფრული მოწყობილობები, ე.წ. საგანმანათლებლო ტექნოლოგია (EdTech).

სკოლის შემდეგ კი მოსწავლეები დროს ატარებენ ტელეფონებთან, პლანშეტებთან და ლეპტოპებთან, სქროლავენ TikTok-ს, აგზავნიან მოკლე და ირონიულ შეტყობინებებს Snapchat-ზე და პარალელურად თვალს გადაავლებენ ხოლმე კლასიკური ლიტერატურის შეჯამებებს, იმის ნაცვლად, რომ წიგნი ხელში აიღონ და სრულად წაიკითხონ.

ჰორვათის თქმით, ეკრანებიდან სწავლამ ისინი ზედაპირულ მკითხველებად აქცია. და ინტელექტუალური "მძიმე შრომის" გარეშე, ყველაზე ბრწყინვალე გონებაც კი შეიძლება დასუსტდეს.

"ტექნოლოგიის წინააღმდეგი არ ვარ. მე სიღრმის და დისციპლინის მომხრე ვარ", — ამბობს ჰორვათი, რომელიც სკოლებში ეკრანთან გატარებული დროის შემცირებას და იმ "ძველ კარგ" პერიოდზე დაბრუნებას ემხრობა, როცა ბავშვებს გამოცდის ჩასაბარებლად წიგნის გადაშლა და ღამის გათენება უწევდათ.

"სამწუხარო ფაქტი, რომლის წინაშეც ჩვენი თაობა დგას, ასეთია: ჩვენი შვილები კოგნიტურად ნაკლებად განვითარებულები არიან, ვიდრე ჩვენ ვიყავით მათ ასაკში", — უთხრა ჰორვათმა სენატის ვაჭრობის, მეცნიერებისა და ტექნოლოგიის კომიტეტს — "კოგნიტური განვითარების სტანდარტიზებული გაზომვა 1800-იანი წლების ბოლოდან მიმდინარეობს. ყოველი თაობა საკუთარ მშობლებზე უკეთეს შედეგებს აჩვენებდა", — თქვა ჰორვათმა. და ეს მხოლოდ აშშ-ში არ ხდება.

"თუ 80 ქვეყნის მონაცემებს შეხედავთ, როგორც კი სკოლებში ფართოდ შემოდის ციფრული ტექნოლოგია, აკადემიური შედეგები მნიშვნელოვნად იკლებს", — ამბობს ჰორვათი, რომელიც ასევე არის არიზონაში დაფუძნებული ორგანიზაცია LME Global-ის დამფუძნებელი. ეს ჯგუფი აკადემიური შედეგების გაუმჯობესებისთვის კვლევებსა და საკლასო პრაქტიკას ერთმანეთთან აკავშირებს.

ჯარედ კუნი ჰორვათი კონგრესში

ფოტო: C-Span

"ყოველ ჯერზე, როცა ტექნოლოგია განათლებაში შედის, სწავლა იკლებს".

მომავლისკენ გახედვისას, ჰორვათი იმედს გამოთქვამს, რომ შეიქმნება ახალი პოლიტიკა, რომელიც სკოლებს აიძულებს კლასებში ტექნოლოგიის გამოყენება შეამცირონ და მომავალ თაობას, Generation Alpha-ს, უფრო მეტი შანსი მისცენ, გახდნენ ნამდვილი "ტვინიკოსები".