7 ოქტომბერს, ევროპარლამენტმა 61 ქვეყნისთვის უვიზო რეჟიმის შეჩერების პროცესის გამარტივებას მხარი დაუჭირა. ცვლილებას მხარი 518-მა ევროპარლამენტარმა დაუჭირა, 96 იყო მოწინააღმდეგე, ხოლო 24-მა თავი შეიკავა.

17 ნოემბერს, ევროკავშირის წევრი ქვეყნები ევროსაბჭოში ცვლილებებს ფორმალურად კიდევ ერთხელ უყრიან კენჭს, ხოლო ახალი მექანიზმის ძალაში შესვლა დეკემბრის დასაწყისიდან იგეგმება.

ახალი მექანიზმი შეეხება 61 ქვეყანას, რომელიც შენგენის ზონაში მოკლე ვადით უვიზოდ მოგზაურობენ. "რადიო თავისუფლების" ევროპის ბიუროს რედაქტორი, რიკარდ იოზვიაკის განცხადებით, შეჩერების ერთ-ერთი მიზეზი მესამე ქვეყნებთან ევროკავშირის პოლიტიკურ ურთიერთობებს უკავშირდება. "კანონპროექტში ნათქვამია, რომ შეჩერების მექანიზმის ამოქმედება შესაძლებელია "ადამიანის უფლებების სერიოზული დარღვევების" ან "საერთაშორისო სამართლისა და სტანდარტების, მათ შორის ადამიანის უფლებების შესახებ კანონის სერიოზული დარღვევებისა და საერთაშორისო სასამართლოს გადაწყვეტილებებისა და გადაწყვეტილებების შეუსრულებლობის" შემთხვევებში".

ამას შესახებ ევროპარლამენტის ყრილობაზე ცვლილებების მომხსენებელმა მატიაზ ნემეცმაც ისაუბრა.

"ევროპა კვლავაც რჩება მსოფლიოში ყველაზე ხშირად მონახულებულ კონტინენტად — როგორც ტურისტების, ისე ბიზნეს მოგზაურების მიერ, და ჩვენი სავიზო პოლიტიკა ამდენად ჩვენი საგარეო პოლიტიკის ერთ-ერთი ყველაზე ძლიერი ინსტრუმენტია. თანამედროვე შეჩერების მექანიზმის საშუალებით, ევროკავშირს შეეძლება დროებით შეაჩეროს უვიზო რეჟიმი ადამიანის უფლებების სერიოზული დარღვევების შემთხვევაში და მიზანმიმართულად გამოიყენოს შეჩერება სახელმწიფო მოხელეებსა თუ სხვა ჯგუფებზე. ეს რეფორმირებული მექანიზმი კიდევ უფრო ამყარებს ჩვენს ერთგულებას ადამიანის უფლებებისა და საერთაშორისო სამართლისადმი," — განაცხადა მატიაზ ნემეცმა.

უვიზო რეჟიმის თავდაპირველი შეჩერება 9 თვით ხდება და გახანგრძლივება — 18 თვით. ახალი მექანიზმით დროებითი შეჩერება 12 თვემდე გაიზარდა, ხოლო გახანგრძლივება — 24 თვემდე.