რომის პაპი ლეო XIV პირველი ამერიკელი პაპია კათოლიკური ეკლესიის ისტორიაში, რომელმაც ხელოვნური ინტელექტის (AI) განვითარებასთან დაკავშირებით ენციკლიკა (საჯარო წერილი, რომლითაც პაპი მთელ ეკლესიას მიმართავს) გამოაქვეყნა. თითქმის 43 000 სიტყვისგან შემდგარ ტექსტში, სახელწოდებით Magnifica Humanitas (დიდებული კაცობრიობა), პაპი მკაცრად მოუწოდებს საერთაშორისო საზოგადოებას, რომ AI მონაცემების მართვა მხოლოდ კერძო კომპანიების ხელში არ დატოვონ. ინფორმაციას Reuters ავრცელებს.

ნაშრომში ხაზგასმულია პოლიტიკოსების როლი ტექნოლოგიურ პროგრესში. პაპი მოუწოდებს გადაწყვეტილების მიმღებ პირებს, დაიცვან დასაქმებულთა უფლებები, უზრუნველყონ ბავშვების უსაფრთხოება ციფრულ ეპოქაში და ხელი შეუწყონ AI დეველოპერებს შორის არსებული მძაფრი კონკურენციის განმუხტვას.

კათოლიკური ეკლესიის 1.4 მილიარდი წევრისთვის განკუთვნილ უმაღლეს სწავლებაში პაპი ლეო აღნიშნავს:

"საჭიროა უფრო აქტიური პოლიტიკური ჩართულობა, რომელსაც შეეძლება პროცესების შენელება მაშინ, როდესაც ყველაფერი ჩქარდება", — აცხადებს ლეო XIV.

რომის პაპი გამოსავალს გლობალურ კონტროლსა და სამართლებრივი ბერკეტების გაძლიერებაში ხედავს. მან საზოგადოებას მოუწოდა "მტკიცე სამართლებრივი ჩარჩოების, დამოუკიდებელი ზედამხედველობის, ინფორმირებული მომხმარებლებისა და ისეთი პოლიტიკური სისტემის შექმნისკენ, რომელიც არ აირიდებს თავის პასუხისმგებლობას".