ისრაელის პრემიერმინისტრმა ბენიამინ ნეთანიაჰუმ აშშ-ის პრეზიდენტ დონალდ ტრამპთან სატელეფონო საუბრისას განაცხადა, რომ ისრაელი საფრთხეების წინააღმდეგ მოქმედების თავისუფლებას შეინარჩუნებს, მათ შორის — ლიბანის მიმართულებითაც. ინფორმაციას ისრაელის პოლიტიკურ წყაროზე დაყრდნობით Reuters ავრცელებს.

ისრაელის პოლიტიკური წყაროს ცნობით, საუბარი ეხებოდა ვაშინგტონსა და თეირანს შორის შესაძლო შეთანხმებას.

"გუშინდელ საუბარში პრეზიდენტ ტრამპთან პრემიერმინისტრმა ხაზი გაუსვა, რომ ისრაელი შეინარჩუნებს მოქმედების თავისუფლებას საფრთხეების წინააღმდეგ ყველა მიმართულებით, მათ შორის ლიბანში, ხოლო პრეზიდენტმა ტრამპმა ეს პრინციპი კიდევ ერთხელ დაადასტურა და მხარი დაუჭირა", — განაცხადა წყარომ Reuters-თან.

ტრამპის განცხადებით, ვაშინგტონმა და თეირანმა უმეტესწილად შეიმუშავეს მემორანდუმი მშვიდობის შეთანხმებაზე, რომელიც ჰორმუზის სრუტის გახსნას ითვალისწინებს.

Reuters წერს, რომ შეთანხმების მოლოდინი გაიზარდა მას შემდეგ, რაც ტრამპმა განაცხადა, რომ პროცესში შუამავლის როლს პაკისტანი ასრულებს.

ირანული სააგენტო "ფარსის" ინფორმაციით, შეთანხმების პროექტი ითვალისწინებს, რომ აშშ და მისი მოკავშირეები ირანსა და მის პარტნიორებს არ დაესხმებიან თავს, სანაცვლოდ კი ირანი ვალდებულებას იღებს, თავადაც არ განახორციელოს პრევენციული თავდასხმები.

ამავე თემაზე კომენტარი გააკეთა ისრაელელმა პოლიტიკოსმა ბენი განცმაც, რომელმაც თქვა, რომ ირანთან შეთანხმების ფარგლებში ლიბანში ცეცხლის შეწყვეტაზე თანხმობა სტრატეგიული შეცდომა იქნება.

ისრაელის წყაროს განცხადებით, აშშ ისრაელს მოლაპარაკებების მიმდინარეობის შესახებ ინფორმაციას აწვდის.

"პრეზიდენტმა ტრამპმა მკაფიოდ განაცხადა, რომ მოლაპარაკებების დროს მტკიცედ დაიცავს საკუთარ მუდმივ მოთხოვნას — ირანის ბირთვული პროგრამის დემონტაჟსა და ქვეყნის ტერიტორიიდან მთელი გამდიდრებული ურანის გატანას და საბოლოო შეთანხმებას ხელს არ მოაწერს, ვიდრე ეს პირობები არ შესრულდება", — ნათქვამია წყაროში.

აღნიშნულ საკითხზე განცხადება თავად ბენიამინ ნეთანიაჰუმაც გაავრცელა. მისი თქმით, ტრამპთან საუბრისას შეთანხმდნენ, რომ ირანთან ნებისმიერმა საბოლოო შეთანხმებამ უნდა აღმოფხვრას ბირთვული საფრთხე.

"გუშინ ღამით პრეზიდენტ ტრამპთან ვისაუბრე ჰორმუზის სრუტის ხელახლა გახსნის შესახებ ურთიერთგაგების მემორანდუმისა და ირანის ბირთვული პროგრამის შესახებ საბოლოო შეთანხმების მისაღწევად მომავალი მოლაპარაკებების შესახებ.

მე ღრმა მადლიერება გამოვხატე პრეზიდენტ ტრამპის მიმართ ისრაელის უსაფრთხოებისადმი მისი ურყევი ერთგულებისთვის, მათ შორის "ლომის ღრიალი" და "ეპიკური მრისხანების" დროს, როდესაც ამერიკული და ისრაელის ძალები მხარდამხარ იბრძოდნენ ირანის საფრთხის წინააღმდეგ.

პრეზიდენტ ტრამპთან შევთანხმდით, რომ ირანთან ნებისმიერმა საბოლოო შეთანხმებამ უნდა აღმოფხვრას ბირთვული საფრთხე. ეს ნიშნავს ირანის ბირთვული გამდიდრების ობიექტების დემონტაჟს და მისი გამდიდრებული ბირთვული მასალის ტერიტორიიდან გატანას.

პრეზიდენტმა ტრამპმა ასევე დაადასტურა ისრაელის უფლება, დაიცვას თავი ყველა ფრონტზე, მათ შორის ლიბანში არსებული საფრთხეებისგან.

ჩვენსა და ჩვენს ორ ქვეყანას შორის პარტნიორობა ბრძოლის ველზე დადასტურდა და არასდროს ყოფილა ასეთი ძლიერი.

ჩემი პოლიტიკა, ისევე როგორც პრეზიდენტ ტრამპის, უცვლელი რჩება: ირანს არ ექნება ბირთვული იარაღი", — დაწერა ნეთანიაჰუმ.

თავად ტრამპმა Truth Social-ზე დაწერა, რომ ნეთანიაჰუსთან სატელეფონო საუბარი "ძალიან კარგად" წარიმართა.

ცნობისთვის, აქამდე, ისრაელსა და ლიბანს შორის ცეცხლის შეწყვეტის შეთანხმება შედგა, თუმცა ლიბანმა ისრაელი შეთანხმების დარღვევაში დაადანაშაულა. პრემიერმინისტრმა ბენიამინ ნეთანიაჰუმ აღნიშნა, რომ ისრაელის ძალები არ დატოვებდნენ პოზიციებს სამხრეთ ლიბანში, ხოლო "ჰეზბოლას" ოფიციალურმა პირებმა გააფრთხილეს მხარეები, რომ დაჯგუფება თავდასხმებზე პასუხის გაცემის უფლებას იტოვებდა.

• ისრაელსა და ლიბანს შორის ცეცხლის შეწყვეტის შეთანხმება შედგა, თუმცა ლიბანი ისრაელს შეთანხმების დარღვევაში ადანაშაულებს