23 მაისს, სერბეთის დედაქალაქ ბელგრადში, ქვეყნის პრეზიდენტის, ალექსანდარ ვუჩიჩის წინააღმდეგ გამართული მასშტაბური ანტისამთავრობო აქციის შემდეგ, მომიტინგეთა ჯგუფებსა და სპეცრაზმს შორის შეტაკებები მოხდა. ინფორმაციას Associated Press ავრცელებს.

მიუხედავად იმისა, რომ ბელგრადის ცენტრალურ მოედანზე გამართულმა აქციამ მშვიდობიანად ჩაარა, მოგვიანებით ახალგაზრდების ჯგუფები სპეცრაზმს დაუპირისპირდნენ — მათ პოლიციის კორდონებს ალმები, ქვები და ბოთლები დაუშინეს. პოლიციამ პასუხად წიწაკის სპრეი გამოიყენა და მათ დასაშლელად წინ წაიწია.

პროტესტის მონაწილეებმმა ქუჩებში ნაგვის ურნები გადმოაყირავეს, რათა ფარებით აღჭურვილი სპეცრაზმისგან თავი დაეცვათ, რომლებიც მათ ალყაში მოქცევას ცდილობდნენ. პოლიციამ ბელგრადის ცენტრალურ ნაწილში სპეცტექნიკა განათავსა, რათა დემონსტრანტებს უკან დაბრუნების საშუალება არ ჰქონოდათ, რის შემდეგაც სიტუაცია მალევე დასტაბილურდა. პოლიციის განცხადებით, დაკავებულია 23 ადამიანი.

23 მაისს, უფრო ადრე, მომიტინგეთა ნაკადი ბელგრადის ცენტრისკენ დაიძრა. ბევრ მათგანს ხელში ბანერები ეჭირა და ეცვა მაისურები წარწერით "სტუდენტები იმარჯვებენ" — ეს იმ ახალგაზრდული მოძრაობის დევიზია, რომელმაც შეკრება მოაწყო. დღის დასაწყისში ბელგრადში ავტომობილების კოლონები სერბეთის სხვა ქალაქებიდანაც ჩავიდნენ.

აღნიშნულ საკითხთან დაკავშირებით კომენტარი გააკეთა თავად ალექსანდრ ვუჩიჩმა. მისი თქმით, სრულიად შესაძლებელია, რომ მალე გადადგეს.

"სრულიად შესაძლებელია, მალე გადავდგე", — განუცხადა ვუჩიჩმა ჟურნალისტებს პეკინში, ჩინეთში მისი ვიზიტის დასაწყისში.

მან დასძინა, რომ არ აპირებს უფლებამოსილების შემცირებას, როგორც ეს თავის დროზე პრეზიდენტმა ბორის ტადიჩმა გააკეთა "კატეგორიული ფორმულირებით, რადგან შენ ან გადადგები, ან პრეზიდენტი ხარ მანდატის ამოწურვამდე".

მან ასევე აღნიშნა, რომ გარკვეული შეკრებები — იგულისხმებოდა სტუდენტური პროტესტი — ვერ შეაშფოთებს, მით უმეტეს მაშინ, როდესაც ისინი მოკლებულია გააზრებულ შინაარსს, არის ცარიელი და არცთუ ისე მრავალრიცხოვანი.