"მქონდა კომუნიკაცია ბატონ რუბიოსთან და ეს ყველაფერი გვინარჩუნებს რწმენას იმისა, რომ შესაძლებელია ქართულ-ამერიკული ურთიერთობების გადატვირთვა," — განაცხადა ირაკლი კობახიძემ აშშ-სთან ურთიერთობებზე, რეგიონში ამერიკის გააქტიურებასა და მოსალოდნელ ვიზიტებთან დაკავშირებით ბრიფინგზე ჟურნალისტთან საუბრისას.

ჟურნალისტის კითხვას, ხომ არ ქმნის პოლიტიკური იზოლაციის შთაბეჭდილებას ის გარემოება, რომ 26 მაისს აშშ-ის სახელმწიფო მდივანი მარკო რუბიო სომხეთს სტუმრობს, ხოლო საქართველოში დაბალი რანგის წარმომადგენლები ჩამოდიან, კობახიძემ განაცხადა, რომ "თავს გრძნობენ ძალიან მყარად, გამომდინარე იქიდან, რომ პირველ რიგში, აქვთ საზოგადოების მხარდაჭერა".

"ჩვენ თავს ვგრძნობთ ძალიან მყარად, გამომდინარე იქიდან, რომ პირველ რიგში, გვაქვს საზოგადოების მხარდაჭერა, ასევე, რაც შეეხება ქართულ-ამერიკულ ურთიერთობებს, რაზეც ძალიან ნერვიულობს ჩვენი ოპოზიცია, გვქონდა რამდენიმე კომუნიკაცია, მათ შორის, მე მქონდა კომუნიკაცია ბატონ რუბიოსთან და ეს ყველაფერი გვინარჩუნებს რწმენას იმისა, რომ შესაძლებელია ქართულ-ამერიკული ურთიერთობების გადატვირთვა. ეს არის დღევანდელი მოცემულობა, დანარჩენი დაველოდოთ მშვიდად მოვლენების განვითარებას," — თქვა მან.

აშშ-სთან პარტნიორობის აღდგენაზე საუბრისას კობახიძემ აღნიშნა, რომ საქართველოს ხელისუფლების პოზიცია უცვლელია.

"ჩვენ თავიდანვე გამოვხატეთ ჩვენი პოზიცია, ხელი გაწვდილია ჩვენი მხრიდან, ვაცხადებთ, რომ მზად ვართ სუფთა ფურცლიდან და კონკრეტული გზამკვლევით აღვადგინოთ სტრატეგიული პარტნიორობა აშშ-სთან, რომელიც წინა ადმინისტრაციამ შეაჩერა. ჩვენ ამაზე თავიდანვე გამოვხატეთ ძალიან მკაფიო პოზიცია და ველოდებოდით ამერიკული მხარის პოზიციას. მოხარული ვართ, რომ ბოლო დროს არის დადებითი ტენდენციები, დანარჩენს დაველოდებით," — აღნიშნა კობახიძემ.

ამასთან, ანაკლიის პროექტთან დაკავშირებულ შეკითხვაზე მთავრობის მეთაურმა განაცხადა, რომ ამერიკულ მხარესთან ამ საკითხზე მოლაპარაკება დეტალურად მიდის აშშ-ის სახელმწიფო დეპარტამენტის წარმომადგენლის, პიტერ ანდრეოლის საქართველოში ვიზიტის ფარგლებში.

"ამ ვიზიტის ფარგლებში გვექნება პირველად შესაძლებლობა, რომ დეტალებზე ვისაუბროთ, პირველ რიგში, დაველოდებით ამერიკული მხარის პოზიციას, მათ შორის, ისინი გამოხატავენ საკუთარ ინტერესებს და ამის მიხედვით ვიმოქმედებთ, დაველოდებით პირველ რიგში, მათ პოზიციას ყველა საკითხთან დაკავშირებით," — თქვა პრემიერმინისტრმა.