"მეუბნებიან, რომ თაღლითი ვარ, რომ ვარ "ფულის გამთეთრებელი", უნდათ, რომ რეპუტაციულად დაასრულონ ჟურნალისტი ელისო კილაძე და დაასრულეთ საჯაროდ" — განაცხადა სასამართლო პროცესზე თაღლითობისა და "ფულის გათეთრების" ბრალდებით დაკავებულმა ჟურნალისტმა ელისო კილაძემ. ამის შესახებ ინფორმაციას IPN-ზე დაყრდნობით "TV პირველი" ავრცელებს.

კილაძის თქმით, მის მიმართ დაწყებული სამართლებრივი პროცესი "მამუკა მდინარაძის შურისძიებაა" და უკავშირდება მის მიერ გამოქვეყნებულ ინფორმაციას. ბრალდებულმა ასევე აღნიშნა, რომ გამოძიებამ სამი თვის განმავლობაში მისი და ყოფილ გენერალურ პროკურორს, ოთარ ფარცხალაძეს, შორის კავშირის დამადასტურებელი მტკიცებულება ვერ მოიპოვა.

"პირდაპირ რომ დამხვრიტოთ, არა?... რა თქმა უნდა, დახურვას არ ვეთანხმები, ამ მოწმეების ვინაობა 3 თვეა, ცნობილია და არანაირი ზემოქმედება მათზე არ ყოფილა, ეს ყურით მოტანილი მიზეზია.

3 თვეა, სატელეფონო ზარები, ოჯახის წევრებთან კომუნიკაცია და წერილები ამიკრძალეს.

მდინარაძის და გვარაკიძის ბრალს არ ვაღიარებ და არ ვეთანხმები, ეს არის მამუკა მდინარაძის შურისძიება, რადგან მისი კრიპტოსაფულე გამოვაქვეყნე, ეს აუცილებლად გამოძიებული იქნება დიდი ალბათობით, ამ ხელისუფლების პირობებში.

ციხეში დავალპობო ნათქვამი აქვს [მდინარაძეს], ვნახოთ, ვინ, სად განაწილდება რუსთავის სამთავრობო კვარტალში...

მდინარაძის ოცნება დროებით ახდა, "ქრონიკა პლუსი" დახურულია, "ფეისბუქიდან" ჩემი პოსტები წაშლილია, მე ვარ მამუკა მდინარაძის ტყვე, ის ელოდებოდა, რომ ვიტირებდი და თხოვნებს გავუგზავნიდი, ციხემ ვერ გამტეხა და ვერც გამტეხავს, ამ საქმეს ჩამოგიშლით, ამის გეშინიათ, ამიტომ ხურავთ ამ პროცესს რომ ჩუმად გამასამართლოთ, მაგრამ ასე ვერ იქნება. ციხეში ვიქნები თუ ციხის გარეთ, ბრძოლა რაც დაწყებულია, ბოლომდე მივა

რაც შეეხება "ქოლ ცენტრებს", ორგანიზებულ ჯგუფს თქვენ აფარებთ ხელს. ხომ თვლიან, რომ დამნაშავე ვარ, გამასამართლეთ საჯაროდ.

მე შეთქმულების თეორიებზე არ ვსაუბრობ, ვსაუბრობ ფაქტებზე, ისეთ რამეს მაბრალებენ, რასაც ვებრძოდი. "ქოლ ცენტრებით" დაინტერესება დაიწყო ლევან ხაბეიშვილის შემდეგ, ის თანამდებობის პირებს ასახელებდა, მე მეორე მხარეს, კეზერაშვილს და ა.შ. ერთადერთი ბერკეტი მრჩება, სასამართლოზე მოწმეთა ჩვენებები ჩამოვანგრიო, მინდა პროცესი იყოს ღია.

მეუბნებიან, რომ თაღლითი ვარ, ვიღაც გერმანელები მოვატყუე და მეუბნებიან, რომ ვარ "ფულის გამთეთრებელი", უნდათ, რომ რეპუტაციულად დაასრულონ ჟურნალისტი ელისო კილაძე და დაასრულეთ საჯაროდ", — განაცხადა მან.

სხდომის დაწყებისას პროკურორმა, მარიამ ბერძენიშვილმა სასამართლოს პროცესის დახურვის შუამდგომლობით მიმართა. მისი განმარტებით, მოწმეების უსაფრთხოება მაღალი რისკის ქვეშაა, რადგან ისინი, მათ შორის, ყოფილი მაღალჩინოსნების წინააღმდეგ მამხილებელ ჩვენებებს აძლევენ და შესაძლოა, მათზე ზეწოლა განხორციელდეს.

მიუხედავად იმისა, რომ კილაძე შუამდგომლობას არ დაეთანხმა და პროცესის საჯაროდ წარმართვა მოითხოვა, მოსამართლემ ბრალდების მხარის მოთხოვნა დააკმაყოფილა. შედეგად, ელისო კილაძის სასამართლო პროცესი სრულად დაიხურა.

ცნობისთვის, ელისო კილაძე ე.წ. "ქოლ-ცენტრების" საქმეზე 18 თებერვალს დააკავეს. ამავე საქმეზე ბრალდებულები არიან ოთარ ფარცხალაძე და ძმები დავით მიქაძე და გიორგი მიქაძე. პროკურატურის ვერსიით, კილაძე დანაშაულებრივი ჯგუფის საქმიანობის კანონიერად წარმოჩენას უზრუნველყოფდა იმ შემთხვევაში, თუ "ქოლ-ცენტრის" საქმიანობის გამოაშკარავების საფრთხე იარსებებდა.