რუსეთის მართლმადიდებლური ეკლესიის მიტროპოლიტი ილარიონი (ალფეევი), რომელსაც მანამდე სექსუალურ შევიწროებაში ადანაშაულებდნენ და საქართველოში ილია II-ის დაკრძალვაზე რუსეთის დელეგაციის შემადგენლობაში იყო, ჩეხეთში დააკავეს. მღვდლის Telegram არხის ცნობით, 24 მაისს, კარლოვი ვარიში პოლიციამ გააჩერა მანქანა, რომელშიც მიტროპოლიტი ილარიონი და მისი თანმხლები ოპერატორი იმყოფებოდნენ.

"ჩხრეკის დროს, ბარგის განყოფილებაში აღმოაჩინეს თეთრი ნივთიერების შემცველი ოთხი პატარა კონტეინერი. ნივთიერების შემადგენლობა, წარმომავლობა და ხასიათი მხოლოდ კომპეტენტურმა ექსპერტმა უნდა დაადგინოს. მიტროპოლიტი ილარიონი კატეგორიულად უარყოფს აკრძალული ნივთიერებების უკანონო შენახვაში რაიმე მონაწილეობას და ინციდენტს პროვოკაციად მიიჩნევს", — ნათქვამია ილარიონის Telegram არხის განცხადებაში.

იმავე Telegram არხის ცნობით, მიტროპოლიტ ილარიონის ადვოკატმა, მიხალ პაკოვსკიმ, განაცხადა, რომ "მანქანის გაჩერებისა და შემდგომი ჩხრეკის გარემოებები სერიოზულ კითხვებს ბადებს".

"მე არანაირი კავშირი არ მაქვს და არც არასდროს მქონია ნარკოტიკების უკანონო ვაჭრობასთან. ჩემთვის, როგორც სასულიერო პირისთვის, ასეთი რამის შესახებ ვარაუდი სრულიად მცდარია. მე მოვითხოვ მომხდარის სრულ, დამოუკიდებელ და პროცედურულად უნაკლო გამოძიებას", — განაცხადა ილარიონმა.

როგროც ჩეხური მედია წერს, მიტროპოლიტი ილარიონი ხელმძღვანელობდა რუსეთის მართლმადიდებლური ეკლესიის ბუდაპეშტ-უნგრეთის ეპარქიას და მიიღო უნგრეთის მოქალაქეობა. თუმცა, მას შემდეგ რაც სტიქაროსანმა, გეორგი სუზუკიმ მას სექსუალურ შევიწყოვებაში დასდო ბრალი, იგი მღვდლად გადაიყვანეს კარლოვი-ვარის წმინდა პეტრესა და პავლეს ეკლესიაში.

2025 წლის ნოემბერში მედიაში გავრცელდა ინფორმაცია, რომ მიტროპოლიტი შესაძლოა ჩეხეთის ეროვნულ სანქციების სიაში მოხვედრილიყო რუსეთის სადაზვერვო სამსახურებთან სავარაუდო კავშირის გამო.

მიტროპოლიტი ილარიონის კარლოვი-ვარიში გამოჩენის შემდეგ, ჩეხეთის რესპუბლიკაში რუსეთის მართლმადიდებლური ეკლესიის ქონება უნგრეთის ეპარქიას გადაეცა. ჩეხეთის რესპუბლიკაში რუსეთის მართლმადიდებლური ეკლესია პირდაპირ ექვემდებარება მოსკოვის საპატრიარქოს და ასოცირდება რუსეთის რეჟიმთან, აღნიშნავს გამოცემა.