საქართველოში აშშ-ის სახელმწიფო დეპარტამენტის წარმომადგენლები ოფიციალური ვიზიტით იმყოფებიან. დელეგაცია ქვეყანაში 24 მაისს ჩამოვიდა და ვიზიტს 29 მაისამდე გააგრძელებს. ამის შესახებ ინფორმაციას IPN ავრცელებს.

საქართველოში აშშ-ის საელჩოს ინფორმაციით, ვიზიტის ფარგლებში ამერიკელი წარმომადგენლები შეხვედრებს გამართავენ საქართველოს ხელისუფლების, პოლიტიკური პარტიების, ბიზნეს სექტორისა და რელიგიური წრეების წარმომადგენლებთან.

საელჩოს განმარტებით, შეხვედრების მთავარი აქცენტი იქნება საქართველო-აშშ-ის ურთიერთობების გაუმჯობესების გზების განხილვა.

"შეხვედრები ფოკუსირებული იქნება ორი ქვეყნის ორმხრივი ურთიერთობების გაუმჯობესების გზაზე დაყენების საჭიროებებზე, ასევე ქართველი და ამერიკელი ხალხის კეთილდღეობის გაზრდაზე," — ნათქვამია განცხადებაში.

დელეგაციის შემადგენლობაში არიან აშშ-ის სახელმწიფო მდივნის ოფისის წარმომადგენელი, სპეციალური თანაშემწე ჩარლზ იოქი და სახელმწიფო დეპარტამენტის ევროპისა და ევრაზიის საქმეთა ბიუროს წარმომადგენელი პიტერ ანდრეოლი.

ცნობისთვის, სომხური მედიის "არმენპრესის" ინფორმაციით, ამ შეხვედრის პარალელურად რეგიონში დაგეგმილია აშშ-ის სახელმწიფო მდივნის, მარკო რუბიოს ვიზიტი სომხეთში 26 მაისს.

სომხეთის საგარეო საქმეთა მინისტრი, არარატ მირზოიანი რუბიოსთან შეხვედრას გამართავს, რის შემდეგაც მხარეები მედიისთვის განცხადებებს გააკეთებენ. სომხური მედიის ცნობით, ასევე მოსალოდნელია ორმხრივი დოკუმენტების ხელმოწერა, ხოლო შეხვედრის დასრულების შემდეგ მირზოიანი პრესკონფერენციას გამართავს.