ქართველი ჟურნალისტი თამუნა მუსერიძე იანუშ კორჩაკის სახელობის საერთაშორისო ჯილდოს, Nagroda Korczaka-ს, მფლობელი გახდა. ნომინაცია, რომელშიც თამუნამ გაიმარჯვა, დაჯილდოებაზე 2026 წელს დაამატეს, რაც ნიშნავს, რომ მუსერიძე ამ ნომინაციის პირველი გამარჯვებულია.

თამუნა საგამოძიებო ჟურნალისტი და პლატფორმა "ვეძებ"-ის დამფუძნებელია, რომლის საშუალებითაც ოჯახებს ერთმანეთის პოვნაში ეხმარება. მან Nagroda Korczaka-ს ჯილდოც სწორედ ჟურნალისტური საქმიანობისა და სოციალური გავლენებისთვის მიიღო. იანუშ კორჩაკის სახელობის ჯილდო გადაეცემათ ისეთ პირებსა თუ ორგანიზაციებს, რომლებსაც ბავშვთა უფლებების დაცვასა და განათლების ხელშეწყობაში დიდი წვლილი შეაქვთ.

ფოტო: Facebook

ნომინაციაში თამუნას გამარჯვებაში მნიშვნელოვანი როლი ითამაშა მის მიერ საქართველოში გაშვილებული ბავშვების ისტორიების საქართველოს ფარგლებს გარეთ გაშუქებამ. აღსანიშნავია, რომ თამუნა მუსერიძის მონაწილეობითა და ჩართულობით, გაყიდული ქართველი ბავშვების შესახებ 2025 წელს HBO Max-მა დოკუმენტური ფილმიც გამოუშვა.

დაჯილდოების ცერემონიაზე სიტყვით გამოსვლისას თამუნამ საქართველოში დიუშენის სინდრომით დაავადებულ ბავშვებზეც ისაუბრა, მათ ოჯახებს მხარდაჭერა გამოუცხადა და სახელმწიფოს მათი მედიკამენტებით უზრუნველყოფისკენ მოუწოდა.