"ეს არის მიზანმიმართული პროვოკაცია და ამას აქვს თავისი მიზანი, რომ ხელოვნურად შემოიტანონ დაძაბულობა, რადგან ის არსებული 30 აკაცუკი და მათი ჩხავილი, ყვირილი არავის არ აინტერესებს," — ამის შესახებ თბილისის მერმა, კახა კალაძემ ჟურნალისტებთან საუბრისას განაცხადა და გამოეხმაურა გუშინ, 8 სექტემბერს, მელიქიშვილის გამზირზე მის შტაბთან გამართულ აქციას, სადაც ოცნების მხარდამჭერები მოქალაქეებს ფიზიკურად გაუსწორდნენ.

კალაძე აქციის მონაწილეებს მოძალადეებს უწოდებს.

"ეს არის მიზანმიმართული პროვოკაცია და ამას აქვს თავისი მიზანი, რომ ხელოვნურად შემოიტანონ დაძაბულობა, რადგან ის არსებული 30 აკაცუკი და მათი ჩხავილი, ყვირილი არავის არ აინტერესებს. ეს არის ადამიანების დაჯგუფება, რომლებიც არიან მოძალადეები. შესაბამისად, როდესაც შენ მიდიხარ და მიზანმიმართულად ხელს უშლი საარჩევნო შტაბს, სადაც უამრავი ადამიანი მუშაობს და იცით, რომ მიმდინარეობს საარჩევნო კამპანია. ამას აქვს თავისი მექანიზმი და მიზანია, რომ შემოიტანონ ხელოვნური დაძაბულობა," — თქვა კალაძემ.

ამავე აქციაზე, კალაძის შტაბის წევრებმა იძალადეს სამართალდამცველებზეც. ვიდეოკადრების არსებობის მიუხედავად, მერი ამტკიცებს, რომ მსგავს ფაქტს ადგილი არ ჰქონია.

"პოლიციელს არავინ არ უსწორდებოდა," — თქვა მან.

დედაქალაქის მერმა შეურაცხყოფა მიაყენა აქციის ქალ მონაწილეებსაც.

"ქალი არ არის აქ არც ერთი, რაღაც სხვა ჯიშია...მანახეთ ერთი ადამიანი რომელია ქალი," — თქვა კალაძემ.

გუშინ, 8 სექტემბერს მელიქიშვილის გამზირზე, კახა კალაძის საარჩევნო შტაბთან, "ოცნების" მხარდამჭერები ფიზიკურად დაუპირისპირდნენ იქ შეკრებილ მოქალაქეებს, აქტივისტებსა და ჟურნალისტებს. ე.წ. ტიტუშკებმა იძალადეს "პუბლიკის", "ნეტგაზეთის" და ასევე უნგრელ ჟურნალისტ ლასლო მეზეშზე. ის სასწრაფო დახმარების ეკიპაჟმა კლინიკაში გადაიყვანა. ამ დრომდე არც ერთი მოძალადე დაკავებული არ არის.

შინაგან საქმეთა სამინისტრომ მელიქიშვილის გამზირზე მომხდარ დაპირისპირებასთან დაკავშირებით გამოძიება ჯგუფური ძალადობის მუხლოთ დაიწყო. ამ დრომდე არც ერთი მოძალადე დაკავებული არ არის. "ტვ პირველის" ინფორმაციით მიყენებული დაზიანებებით ამ დრომდე კლინიკაში რჩება 2 მოქალაქე.