აშშ-ის პრეზიდენტმა დონალდ ტრამპმა გამოსვლისას იხუმრა, რომ საკუთარ თავს "ღირსების მედლით" (Medal of Honor) დააჯილდოებდა. ინფორმაციას People ავრცელებს.

ტრამპმა აღნიშნული განცხადება ხუთშაბათს, 10 სექტემბერს, ტექსასის შტატის ქალაქ არლინგტონში, "ღირსების მედლის ეროვნულ მუზეუმში" გამოსვლისას გააკეთა. მან აღნიშნა, რომ ღონისძიებას მედლის 65 ცოცხალი მფლობელიდან 15 ესწრებოდა.

"იცით, ეს არასდროს მითქვამს... მინდა, რომ საკუთარ თავს კონგრესის ღირსების მედალი გადავცე და ეს საკითხი შევისწავლე კიდეც...საკუთარ თავს მივანიჭებდი, არანაირი პრობლემა არ მაქვს, თუმცა ამის უფლება არ მაქვს. გჯერათ? ერთადერთი რამაა, რისი უფლებაც არ მაქვს. საკუთარ თავს მივანიჭებდი [მედალს] და 15-ის ნაცვლად 16 ვიქნებოდით, თუმცა ამის გაკეთების უფლებას არ მაძლევენ", — განაცხადა ტრამპმა.

ამის შემდეგ პრეზიდენტმა აღნიშნა, რომ მისმა ნათქვამმა შესაძლოა მედიის ყურადღება მიიპყროს და სტატიების სათაურებში მოხვდეს, განსაკუთრებით იმის გათვალისწინებით, რომ პოლიტიკური გამოსვლებისას ხშირად მიმართავს სარკაზმსა და იუმორს.

მან დასძინა, რომ პოლიტიკოსებს არ შეუძლიათ მარტივად გამოიყენონ სარკაზმი ისე, რომ მათი სიტყვები პირდაპირი მნიშვნელობით არ აღიქვან.

"პოლიტიკის სამყაროში ერთ რამეს ვერ გააკეთებ — ვერ იქნები სარკასტული, ვერ გაერთობი და ვერ გააკეთებ ვერაფერს, რაც საყვარლობა გგონია. ასე რომ, ამ საღამოს მთავარი ამბავი იქნება: "დონალდ ტრამპს საკუთარი თავისთვის კონგრესის ღირსების მედალი სურს". მე უბრალოდ ვხუმრობ. სინამდვილეში, არც ვხუმრობ — ნამდვილად ისურვებდა კაცი", — დასძინა მან.