ოცნების პარლამენტის თავმჯდომარე, შალვა პაპუაშვილი გუშინ, 8 სექტემბერს კახა კალაძის საარჩევნო შტაბთან მომხდარ ფიზიკურ დაპირისპირებას სოციალურ ქსელში გამოეხმაურა. ის წერს, რომ "გერმანიის ელჩისგან მხარდაჭერილი ტიტუშკები "ქართული ოცნების თბილისის შტაბს დაესხნენ".

"გერმანიის ელჩისგან მხარდაჭერილი ტიტუშკები, დღეს, უკვე მესამედ, ფაშისტური შეძახილებით, თავს დაესხნენ ქართული ოცნების თბილისის შტაბს.

საარჩევნო კამპანიის დროს, უცხო ქვეყნის ელჩის მხრიდან, ექსტრემისტების მხარდაჭერა და ძალადობის არ დაგმობა, ვენის კონვენციის დარღვევით, არჩევნებში უხეში ჩარევის მაგალითია", — დაწერა პაპუაშვილმა.

ცნობისთვის, გუშინ, 8 სექტემბერს მელიქიშვილის გამზირზე თბილისის მერის, კახა კალაძის შტაბთან გამართულ საპროტესტო აქციაზე ოცნების მხარდამჭერები ჟურნალისტებს, სამოქალაქო აქტივისტებსა და რიგით მოქალაქეებს ფიზიკურად გაუსწორდნენ. მედიის დაშავებულ წარმომადგენლებს შორისაა უნგრელი ჟურნალისტი ლასლო მეზეში, რომელიც ამბობს, რომ აქციაზე ტელეფონი წაართვეს და სცემეს.

პუბლიკის განცხადებით, მელიქიშვილის გამზირზე მიმდინარე დაპირისპირების დროს მათი გამოცემის ორ ჟურნალისტს — ალექსანდრე ქეშელაშვილსა და ქეთო მიქაძეს, ჟურნალისტური საქმიანობის შესრულების დროს ფიზიკურად გაუსწორდნენ და ტელეფონები წაართვეს. ალექსანდრე ქეშელაშვილს ტელეფონი დაუბრუნეს, ქეთო მიქაძისთვის ამ დრომდე არ დაუბრუნებიათ. ფიზიკური დაზიანებები აღენიშნება Netgazet-ის ჟურნალისტსაც.

გელა გელაძის უწყებამ გამოძიება სისხლის სამართლის კოდექსის 126-ე მუხლის პირველი პრიმა ნაწილით დაიწყო, რაც ჯგუფურად ჩადენილ ძალადობას გულისხმობს.