რუსეთის პრეზიდენტი ვლადიმერ პუტინი ინდოეთის დედაქალაქ დელიში ჩავიდა. იგი ბრიქსის (BRICS) 11-წევრიან სამიტს დაესწრება, რომლის მთავარი თემებიც ახლო აღმოსავლეთსა და უკრაინაში მიმდინარე ომები, ასევე ეკონომიკური გამოწვევები იქნება. ინფორმაციას The Guardian ავრცელებს.

გავრცელებული ცნობებით, რუსეთის პრეზიდენტი და მისი ირანელი კოლეგა, მასუდ პეზეშკიანი, ინდოეთის პრემიერმინისტრ ნარენდრა მოდისთან შეხვედრას გეგმავენ. ორდღიან სამიტს ასევე დაესწრება ჩინეთის ლიდერი სი ძინპინი.

სააგენტო "რია ნოვოსტის" მიერ გავრცელებული კადრების თანახმად, პუტინი დელის პალამის სამხედრო-საჰაერო ბაზაზე დაეშვა, სადაც მას ინდოეთის საგარეო საქმეთა სახელმწიფო მინისტრი კირტი ვარდჰან სინგჰი დახვდა.

The Guardian წერს, რომ დელის ქუჩებში პრემიერ ნარენდრა მოდის პოსტერები გამოაკრეს. დედაქალაქში უსაფრთხოების ზომები გამკაცრებულია, ხოლო ცენტრალურ რაიონებში სატრანსპორტო შეზღუდვები მოქმედებს. დელის პოლიცია მოსახლეობას მოთმინებისა და თანამშრომლობისკენ მოუწოდებს.

შეგახსენებთ, BRICS-ის სამიტი 12-13 სექტემბერს გაიმართება.

ცნობისთვის, BRICS არის მსხვილი განვითარებადი ეკონომიკების მრავალმხრივი გაერთიანება, რომლის მიზანია წევრ ქვეყნებს შორის ეკონომიკური და პოლიტიკური თანამშრომლობა, ასევე გლობალურ პოლიტიკაში დასავლეთის დომინირების საპირწონე ძალის შექმნა.

BRICS-ში სულ 11 ქვეყანაა. ესენია: ბრაზილია, რუსეთი, ინდოეთი, ინდონეზია, ჩინეთი, სამხრეთ აფრიკა,
ირანი, საუდის არაბეთი, არაბთა გაერთიანებული საამიროები ეგვიპტე და ეთიოპია.