"საერთაშორისო გამჭვირვალობა — საქართველო" სტრასბურგის სასამართლოში აქტივისტ თამარ მექვაბიშვილის უფლებებს დაიცავს. ორგანიზაციამ აქტივისტის საქმეზე სასამართლოში საჩივარი გაგზავნა.

20 მაისს თბილისის საქალაქო სასამართლოს მოსამართლემ, თორნიკე კაპანაძემ მექვაბიშვილს ტროტუარზე დგომისთვის 2-დღიანი ადმინისტრაციული პატიმრობა შეუფარდა. აქტივისტს შსს 2025 წლის 17 დეკემბერს პარლამენტის წინ ტროტუარზე ქვეითთა გადაადგილებისთვის დაბრკოლების შექმნას ედავებოდა.

"ივანიშვილისა და მოსამართლეთა კლანის მიერ მართულმა სასამართლომ თამარ მექვაბიშვილი პარლამენტის შენობის წინ, ტროტუარზე, მშვიდობიან საპროტესტო აქციაში მონაწილეობის გამო ადმინისტრაციულ სამართალდამრღვევად ცნო და მას 2 დღით ადმინისტრაციული პატიმრობა შეუფარდა.

როგორც ყველა სხვა მსგავს საქმეში, ამჯერადაც პირველი ინსტანციის და სააპელაციო სასამართლოების დადგენილებები აშკარა წინააღმდეგობაშია საქართველოს კონსტიტუციითა და ადამიანის უფლებათა ევროპული კონვენციით უზრუნველყოფილ შეკრებისა და გამოხატვის თავისუფლებებთან, პირადი ცხოვრების ხელშეუხებლობისა და სამართლიანი სასამართლოს უფლებებთან. ისინი ასევე წინააღმდეგობაშია საქმეში არსებულ ვიდეოჩანაწერებზე აღბეჭდილ ფაქტებთან, რადგან აღნიშნულ ჩანაწერებში აშკარად ჩანს, რომ პარლამენტის წინ ტროტუარზე შეკრებილი მომიტინგეები, მათ შორის, თამარ მექვაბიშვილი არავის გადაადგილებას არ უშლიდნენ ხელს," — წერს ორგანიზაცია.