გუშინ, კახა კალაძის შტაბთან შტაბის წევრებმა მოქალაქეებზე, აქტივისტებსა და ჟურნალისტებზე ფიზიკურად იძალადეს. შსს-მ მელიქიშვილის გამზირზე მომხდართან დაკავშირებით გამოძიება ჯგუფური ძალადობის მუხლით დაიწყო. თუმცა, ამ დრომდე არავინ დაუკავებიათ.

ოცნების მხარდამჭერებმა "პუბლიკის" ორ ჟურნალისტს ქეთო მიქაძესა და ალექსანდრე ქეშელაშვილს ტელეფონები წაართვეს, "ნეტგაზეთის" ჟურნალისტს, ქეთევან ხუციშვილს კი პოლიციელმა აგინა და პროფესიულ საქმიანობაში ხელი შეუშალა. ოცნების მხარდამჭერებმა ფიზიკურად იძალადეს და სახეზე დაზიანებები მოაყენეს ასევე უნგრელ ჟურნალისტს, ლასლო მეზეშს.

"პუბლიკას" ჟურნალისტებმა მათზე განხორციელებულ ძალადობისა და ტელეფონების წართმევის გამო 112-ს მიმართეს, თუმცა განმეორებითი ზარის შემდეგაც პოლიცია ადგილზე არ მისულა.

"პუბლიკის ჟურნალისტზე, ქეთო მიქაძეზე ძალადობისა და ტელეფონის წართმევის ფაქტზე გამოცემამ რეაგირებისთვის 112-ს მიმართა.

პოლიცია ადგილზე არ მოვიდა. ნახევარი საათის გასვლის შემდეგ 112-ზე ხელმეორედ დავრეკეთ.

23:00 საათისთვის ქართული ოცნების შტაბიდან მათი პარტაქტივი გამოვიდა, მათ შორის იყო ლევან ზარდიაშვილი, რომელმაც ჟურნალისტს ტელეფონი წაართვა. მისი შტაბიდან გამოსვლის დროს პუბლიკის მიერ გამოძახებული პოლიცია ადგილზე კვლავ არ იყო მოსული.

საბოლოოდ, ჩვენი გამოძახების საფუძველზე პოლიცია ადგილზე არ მოვიდა.
პარტაქტივის მიერ შტაბის დატოვების შემდეგ გამომძიებელი დაგვიკავშირდა და პოლიციის განყოფილებაში მისვლა გვთხოვა.", — წერია გავრცელებულ ინფორმაციაში.

"ნეტგაზეთის" ჟურნალისტი ქეთევან ხუციშვილი ფეისბუქზე ლაივში აშუქებდა ქართული ოცნების მერობის კანდიდატის საარჩევნო შტაბთან მიმდინარე პროცესებს, როცა მას პოლიციელმა აგინა და პროფესიულ საქმიანობაში ხელი შეუშალა.

"ვუთხარი რომ მე ვარ მედიის წარმომადგენელი, ჩემს პროფესიულ საქმიანობას ვასრულებ, ნაცვლად იმისა ხელი არ შეეშალა გადაღებაში, პირიქით, სიტყვიერი შეურაცხყოფა მომაყენა როგორც მან [პოლიციის თანამშრომელმა], ისე ქართული ოცნების შტაბიდან გამოსულმა ერთ-ერთმა მოქალაქემ. შემაგინეს და მუჯლუგინებიათა და ხელის კვრით გადამწიეს ადგილიდან," — ამბობს ქეთევან ხუციშვილი "ნეტგაზეთის" მიერ გავრცელებულ ვიდეოში.

დაშავებულებს შორისაა ასევე უნგრელი ჟურნალისტი ლასლო მეზეში. ის სოციალურ მედიაში გავრცელებულ ვიდეოში ამბობს, რომ იღებდა, როცა ტელეფონი წაართვეს და სცემეს. მოგვიანებით ის სასწრაფო დახმარების ეკიპაჟმა კლინიკაში გადაიყვანა.

გელა გელაძის უწყებამ გამოძიება სისხლის სამართლის კოდექსის 126-ე მუხლის პირველი პრიმა ნაწილით დაიწყო, რაც ჯგუფურად ჩადენილ ძალადობას გულისხმობს.