პარლამენტის თავმჯდომარე შალვა პაპუაშვილი აცხადებს, რომ საკონსტიტუციო სასამართლოს 9 თვე აქვს იმისთვის, რომ გადაწყვეტილება გამოიტანოს ოპოზიციური პარტიების აკრძალვის საქმეზე. კანონის მიხედვით, საკონსტიტუციო სასამართლოს განაჩენი იანვრის მეორე ნახევარში უნდა გახდეს ცნობილი.

მან ჟურნალისტებთან საუბრისას თქვა, რომ ოპოზიციური პარტიების აკრძალვის მოთხოვნა "არა თუ მათი ტაქტიკა, ქართული ოცნების საარჩევნო დაპირებაა, რომელსაც მილიონ 120 ათასმა ამომრჩეველმა დაუჭირა მხარი". ის ამტკიცებს, რომ სარჩელი "ძალიან დასაბუთებულია და ის პარტიები, რომლებიც დასახელებული ჰყავთ სარჩელში, ანტიკონსტიტუციურები არიან.

"სასამართლოს თავისი დრო სჭირდება იმისთვის, რომ მათ შორის სარჩელს გაეცნოს. მთავარია, რომ ეს ვადებში იყოს და ეს ვადები არ არის გრძელი, დათქმულია — 9 თვე არის ვადა განსაზღვრული კანონმდებლობით, ასე რომ ეს არ არის ისეთი ვადა, რომელიც ძალიან შორეულ მომავალში იქნება.

რაც შეეხება შინაარსს, ჩვენ ვფიქრობთ, რომ ძალიან დასაბუთებულია ჩვენი სარჩელი და ის პარტიები, რომლებიც ჩვენ დასახელებული გვყავს სარჩელში, არიან ანტიკონსტიტუციურები და ამისთვის გვაქვს ძალიან მყარი არგუმენტები, ამიტომ ჩვენ ვართ ძალიან დარწმუნებულები ჩვენ არგუმენტებში და დარწმუნებულები ვართ, შევძლებთ დავარწმუნოთ საკონსტიტუციო სასამართლო ამ არგუმენტების სისწორეში", — ამბობს პაპუაშვილი.

მისი თქმით, გერმანიაში AfD-ის აკრძალვაზე საუბრობენ, მიუხედავად იმისა, რომ პარტიას დანაშაული არ ჩაუდენია, ხოლო საქართველოში საუბარია იმ პარტიების აკრძალვაზე, რომლებიც ხელისუფლებაში ყოფნისას, მისი შეფასებით, არაერთი დანაშაული ჩაიდინეს — მათ შორის, წამების სისტემა და ბიზნესის რეკეტი შექმნეს და ტერიტორიები დაკარგეს.

შალვა პაპუაშვილმა დღევანდელ ბრიფინგზეც გააკრიტიკა ბრიუსელი და ევროკავშირი. მისი თქმით, ბრიუსელი საქართველოს ხელისუფლებას აკრიტიკებს პარტიის აკრძალვის გამო, მაგრამ თუ პარტია ანტიკონსტიტუციურია, "მისი აკრძალვა შეიძლება".

"როდესაც ბრიუსელიდან გვესმის, რომ პარტიის აკრძალვა დემოკრატიაში როგორ შეიძლება. ძალიან კარგადაც შეიძლება, თუკი ანტიკონსტიტუციური პარტიაა, მას არაფერი ესაქმება პოლიტიკურ სივრცეში და ამას ითვალისწინებს ჩვენი კონსტიტუცია. ახლა ვისმე თუ სხვა წარმოდგენა აქვს, მიხედოს თავის კონსტიტუციას.“

...ეს არის არა თუ ტაქტიკა, ეს არის ჩვენი საარჩევნო დაპირება, რომელსაც მილიონ 120 ათასმა ამომრჩეველმა მხარი დაუჭირა. ამასაც აქვს მნიშვნელობა, როდესაც ჩვენ კრიტიკოსებზე ვსაუბრობთ. ამ სარჩელის უკან დგას არა მხოლოდ საპარლამენტო წარმომადგენლობა, არამედ ამ სარჩელის უკან დგას საქართველოს მილიონ 120 ათასი ამომრჩეველი.

ასე რომ, ეს არის არა მხოლოდ შინაარსობრივად მყარი, არამედ ეს არის დემოკრატიულად მყარი და ლეგიტიმური სარჩელი. არის საარჩევნო დაპირება და, რა თქმა უნდა, ჩვენ ამ სარჩელს ბოლომდე მივიყვანთ", – განაცხადა პაპუაშვილმა.

შეგახსენებთ, რომ პირველი სარჩელი 2025 წლის 31 ოქტომბერი იქნება შეტანილი და მაშინ მოთხოვნა იყო 3 პარტიის აკრძალვა. ესენია: ერთიანობა — ნაციონალური მოძრაობა (ენმ), კოალიცია ცვლილებისთვის (გვარამია, მელია, გირჩი, დროა), ძლიერი საქართველო — ლელო (ხალხისთვის, თავისუფლებისთვის).

სარჩელს 88 დეპუტატი აწერდა ხელს (ქართული ოცნება + ხალხის ძალა + ევროპელი სოციალისტები).

მეორე (განახლებული) სარჩელი: 2026 წლის 20-21 აპრილს შეიტანეს. ქართულმა ოცნებამ ძველი სარჩელი უკან გამოითხოვა და ახალი შეიტანა, სადაც იმავე სამ პარტიას დაემატა მეოთხე — ფედერალისტები (თამარ ჩერგოლეიშვილი, გიგა ბოკერია). მიზეზად დაასახელეს 2026 წლის 2 მარტს შექმნილი ოპოზიციური ალიანსი, რომელშიც 9 პარტია გაერთიანდა და ფედერალისტებმაც გაიზიარეს "არაკონსტიტუციური მიზნები".

ორივე შემთხვევაში, მცირე პარტიები (დროა, გირჩი-მეტი თავისუფლება, სტრატეგია აღმაშენებელი, ევროპული საქართველო, რესპუბლიკური პარტია) სარჩელში მოხსენიებულია, მაგრამ მათი აკრძალვა ჯერჯერობით მოთხოვნილი არ არის "არსებითი გავლენის არქონის" გამო. სარჩელში გახარია საქართველოსთვის საერთოდ არ ფიგურირებს.

მეტი პარტიების აკრძალვაზე: