ცხოველების უფლებადამცველი თამაზ ელიზბარაშვილი ციხიდან წერილს აგზავნის. "ტვ პირველის" ცნობით, ის მე-4 დღეა შიმშილობს.

ელიზბარაშვილი წერილში წერს, რომ მას დაშინების მიზნით პროსამთავრობო ტელეკომპანია "იმედის" თანამშრომლები მიუგზავნეს და პოლიციაში მას შემდეგ დარეკეს, რაც მისგან ბოდიში ვერ მიიღეს.

"სწორედ ჩემი დაშინების მიზნით მომიგზავნეს დაქირავებული "იმედის" თანამშრომლები. 7 კაცმა მორალი მიკითხა, რომ თურმე უკრაინის მხარდამჭერი პოსტების განთავსება ჩემს Facebook-გვერდზე სამარცხვინო საქმე ყოფილა. "იმედის" აუგად მოხსენიებისთვის კი ბოდიში უნდა მომეხადა მათთვის. ხელი შემახეს და მაგინეს, მაგრამ, როგორც კი ბოდიში ვერ მიიღეს, პოლიციაში მიჩივლეს.

ერთმა კაცმა, თამაზ ელიზბარაშვილმა, "იმედის" შვიდი "ვაჟკაცი" თანამშრომელი ისე შეაშინა, რომ, როგორც ერთ-ერთი მათგანი თავად ამბობს, დღემდე უნებლიე შარდვა აქვს. სასაცილოა, ხომ? რისი შეეშინდა, იცით? გულზე ხელი რომ დავიდე, იმის.

დაქირავებული რუსული "იმედის" 7 ბრგე "ვაჟკაცი" კურდღლებივით ერთმანეთს ზედ ახტებოდა და ისე გარბოდა", — წერს "ტვ პირველისთვის" გამოგზავნილ წერილში ელიზბარაშვილი.

4 სექტემბერს თბილისის საქალაქო სასამართლომ ცხოველების უფლებადამცველს და ბიზნესმენ თამაზ ელიზბარაშვილს აღკვეთი ღონისძიების სახით პატიმრობა შეუფარდა.

1-ელ სექტემბერს, დაახლოებით საღამოს 9 საათზე, ბიზნესმენი თამაზ ელიზბარაშვილი საკუთარ ბინაში ჩხრეკისას დააკავეს, მანამდე სამართალდამცავებმა ჩხრეკა ჩაატარეს მის ავტომობილში. როგორც პოლიციელები ადგილზე აცხადებდნენ, იარაღს ეძებდნენ. ამას კი წინ უძღოდა რესტორანში მომხდარი სიტყვიერი დაპირისპირება ელიზბარაშვილსა და 7 პირს შორის. პროკურატურის ცნობით, მომხდარი სიტყვიერი კონფლიქტის დროს, თამაზ ელიზბარაშვილი დაემუქრა დაზარალებულს და მასთან ერთად მყოფ პირებს.

9 სექტემბერს პატიმრობაში მყოფი ცხოველების უფლებადამცველმა თამაზ ელიზბარაშვილმა ციხიდან წერილი გაავრცელა, სადაც წერდა, რომ პროტესტის ნიშნად შიმშილობა დაიწყო და საზოგადოებას მხარდაჭერისკენ მოუწოდებდა.

ვრცლად თამაზ ელიზბარაშვილის საქმეზე: