რუსული პროსამთავრობო გამოცემა "კომერსანტი" ქართველი აქტივისტის, თორნიკე რაზმაძის წინააღმდეგ საქმის აღძვრას ეხმაურება. გამოცემა წერს, რომ "საქართველოს შინაგან საქმეთა სამინისტრომ რუსი ჟურნალისტისა და მედიამენეჯერის, მარგარიტა სიმონიანის შეურაცხყოფის გამო ბლოგერისა და ოპოზიციონერი აქტივისტის, თორნიკე რაზმაძის წინააღმდეგ ადმინისტრაციული საქმე აღძრა".

რუსული გამოცემა, IPN-ზე დაყრდნობით წერს, რომ შსს-ის სიძულვილის ენის წინააღმდეგ ბრძოლის სამმართველომ საქმე ადმინისტრაციულ სამართალდარღვევათა კოდექსის წვრილმანი ხულიგნობის მუხლით აღძრა და საქმე სიმონიანის მისამართით უცენზურო გამონათქვამებს ეხება. ბლოგერს ჯარიმა ან ადმინისტრაციული პატიმრობა ემუქრება.

დავაზუსტებთ, რომ მოგვიანებით, შსს-მ გაავრცელა განცხადება, სადაც ნათქვამია, რომ რაზმაძეს პრემიერ ირაკლი კობახიძისთვის შეურაცხმყოფელი კომენტარის დაწერას ედავებიან.

რაც შეეხება რუსულ "კომერსანტს", ის მომხდარის შესახებ თორნიკე რაზმაძის ვერსიას ჰყვება:

ბლოგერი ამბობს, რომ სიმონიანი "რასია 1"-ის გადაცემაში "ვეჩერ ს ვლადიმირომ სალავიოვომ" საუბრისას აცხადებდა, რომ ქართველი მეფე ერეკლე II ბაგრატიონი XVIII საუკუნის ბოლოს "მუხლებზე დაჩოქილი სთხოვდა რუსეთს, საქართველო მფარველობის ქვეშ მიეღო". მისივე თქმით, მალე "სხვა ქართველები, სხვა ერეკლეები გამოჩნდებიან, რომლებიც ასევე მიხოხდებიან რუსეთთან მფარველობის სათხოვნელად".

"პრობლემა ის კი არ არის, დამაჯარიმებენ თუ ციხეში ჩამსვამენ, არამედ ის, თუ რა გზავნილს უგზავნის საქართველოს ხელისუფლება ამით მოსკოვს", — კვლავ რაზმაძეს ციტირებს "კომერსანტი".

ბლოგერი ასევე აღნიშნავს, რომ მმართველი პარტია ქართული ოცნება თავად მიიჩნევს ერეკლე II-ს გამორჩეულ სახელმწიფო მოღვაწედ, ხოლო პრემიერმინისტრი ირაკლი კობახიძე 1783 წელს რუსეთის იმპერიასთან "გეორგიევსკის ტრაქტატის" გაფორმების შესახებ მეფის გადაწყვეტილებას "საქართველოს გადარჩენად" აფასებს.

მისი თქმით, შესაბამისად, "ერეკლე მეფის შეურაცხყოფა, როგორც ჩანს, ხელისუფლებისთვისაც მიუღებელი უნდა იყოს", თუმცა მათ "ოპოზიციონერი ბლოგერის დასჯა გადაწყვიტეს“, — ამბობს თორნიკე რაზმაძემ.

შეგახსენებთ, რომ საქმე ეხება რუსი პროპაგანდის, მარგარიტა სიმონიანის განცხადებას ერეკლე მეორესთან დაკავშირებით. კერძოდ, სიმონიანმა თქვა, რომ როგორც ერეკლე II მოვიდა რუსეთთან და "გეორგიევსკის ტრაქტატის" გაფორმებით მფარველობის მიღება ითხოვა, მომავალში სხვა ქართველი "ირაკლები" რუსეთს ისევ მუხლებზე დაჩოქილები მიმართავენ და მფარველობას სთხოვენ.

თორნიკე რაზმაძის მიერ გავრცელებულ ვიდეოში სიმონიანის კომენტარს დართული აქვს პრემიერ ირაკლი კობახიძის განცხადება მისივე ბრიფინგიდან, რომელიც "გეორგიევსკის ტრაქტატს" ეძღვნებოდა. ამავე ვიდეოს კომენტარში კი რაზმაძე წერს: "ამათი დედას შევე*ი "ნა კალენიახ".

მეტი თორნიკე რამზაძის საქმეზე: