ამერიკის შეერთებული შტატების პრეზიდენტმა, დონალდ ტრამპმა, რუსეთს უკრაინაში სამხედრო მოქმედებების შეწყვეტისთვის 50-დღიანი ვადა 10-დღემდე შეუმცირა. ათვლა 29 ივლისიდან იწყება. ამის შესახებ მან ჟურნალისტებთან საუბრისას განაცხადა.

"ათვლა იწყება დღევანდელი დღიდან," — თქვა ტრამპმა.

მისივე თქმით, თუ რუსეთი დათქმულ ვადაში არ გადადგამს ნაბიჯებს, აშშ ტარიფებსა და სხვა ეკონომიკურ ზომებს დააწესებს.

"არ ვიცი, იმოქმედებს თუ არა ეს რუსეთზე, მაგრამ რუსეთს, როგორც ჩანს, ომის გაგრძელება უნდა," — აღნიშნა ტრამპმა.

ცნობისთვის, ტრამპი აცხადებდა, რომ რუსეთს ომის შესაჩერებლად 50-დღიან ვადას აძლევდა, წინააღმდეგ შემთხვევაში რუსეთისა და მისი სავაჭრო პარტნიორების წინააღმდეგ 100-პროცენტიანი სავაჭრო ტარიფების დაწესებას გეგმავდა.

თუმცა, 28 ივლისს ამერიკის ლიდერმა განაცხადა, რომ რუსეთითა და პროცესის პროგრესით იმედგაცრუებულია და ამიტომ ვადას 10-12 დღემდე ამცირებს. გარდა ამისა, ტრამპმა თქვა, რომ აღარ აქვს სურვილი ესაუბროს რუსეთის პრეზიდენტ ვლადიმერ პუტინს, თუმცა არ დაუკონკრეტებია, რა სახის ან რა საკითხზე კონტაქტს გულისხმობდა.