უკრაინის პრეზიდენტმა ვოლოდიმირ ზელენსკიმ X-ის პირად ანგარიშზე გამოაქვეყნა ინფორმაცია რუსეთის მიერ უკრაინის ქალაქებზე გუშინდელი მორიგი მასშტაბური საჰაერო შეტევის შესახებ. მისი თქმით, გასულ ღამეს, უკრაინამ მოიგერია 300-ზე მეტი დარტყმითი დრონისა და 30-ზე მეტი სხვადასხვა ტიპის რაკეტის ერთობლივი იერიში. საჰაერო სამიზნეების განადგურება ამ დროისთვისაც გრძელდება.

ზელენსკის განცხადებით, იერიშის შედეგად დაზარალდა დონეცკის, კიროვოჰრადის, დნიპროს, სუმის, ხერსონის, ვოლინის, ზაპოროჟიეს, მიკოლაევის, ოდესისა და ჟიტომირის რეგიონები. განსაკუთრებით მძიმე ვითარებაა სუმის ოლქში, სადაც კრიტიკული ინფრასტრუქტურის დაზიანების გამო ათასობით ოჯახი ელექტროენერგიის გარეშეა დარჩენილი. შოსტკა კომბინირებული შეტევის სამიზნე გახდა.

"ოდესაში დაზიანდა საცხოვრებელი კორპუსი — დაშავდა ექვსი ადამიანი, მათ შორის ერთი ბავშვი. სამწუხაროდ, ერთი ადამიანი დაიღუპა. ვუსამძიმრებ მის ოჯახსა და ახლობლებს", — წერს უკრაინის პრეზიდენტი.

დარტყმებმა ასევე მნიშვნელოვნად დააზიანა ინფრასტრუქტურა პავლოგრადში. ამ დროისთვის სამაშველო და აღდგენითი სამუშაოები ყველა დაზარალებულ რეგიონში ინტენსიურად მიმდინარეობს.

ზელენსკიმ მადლობა გადაუხადა საერთაშორისო პარტნიორებს შეთანხმებების სწრაფი შესრულებისთვის და ხაზი გაუსვა ერთობლივი შეიარაღების, მათ შორის ჩამსხლეტი დრონების და ჰაერსაწინააღმდეგო სისტემების წარმოების აუცილებლობას უკრაინაში. როგორც მან აღნიშნა, ეს გადაწყვეტილებები უშუალოდ ადამიანების სიცოცხლეს იცავს და დღეს ქვეყნისთვის სასიცოცხლოდ მნიშვნელოვანია.

"მადლობას ვუხდი ყველა იმ ლიდერს, ვინც აცნობიერებს, რამდენად მნიშვნელოვანია ჩვენი შეთანხმებების სწრაფად შესრულება. იარაღის ერთობლივი წარმოება, ინვესტიციები უკრაინაში დრონების (განსაკუთრებით ჩამსხლეტი დრონების) შექმნაში, ჰაერსაწინააღმდეგო სისტემებით და მათთვის საჭირო რაკეტებით ჩვენი უზრუნველყოფა და მათი წარმოების შესაძლებლობა უკრაინის შიგნით — ეს ყველაფერი იცავს ადამიანების სიცოცხლეს და სასიცოცხლოდ მნიშვნელოვანია ჩვენი ქვეყნისთვის დღეს,"— აცხადებს ზელენსკი