რადგან სომხური სატვირთოები, რომლებიც LPG-ს ატარებენ, რუსეთის მხრიდან საქართველოში კვლავ ვერ შედიან, თხევადი ნავთობის გაზის (LPG) ფასებმა 50%-ით მოიმატა. მიუხედავად იმისა, რომ საქართველო უარყოფს სატვირთოების შეჩერებას, მძღოლები აცხადებენ, რომ მათგან 1,500 დოლარამდე ქრთამს ითხოვენ, რათა მათ საქართველოს გავლა შეძლონ.

მთელი კვირის განმავლობაში, LPG-ის ფასმა სომხურ ბენზინგასამართ სადგურებზე ლიტრზე ֏180-ს ($0.47) მიაღწია, რაც წინა ფასთან შედარებით(֏120 ($0.31) ლიტრზე) მკვეთრი ზრდაა.

სომხეთის ეკონომიკის მინისტრმა გევორგ პაპოიანმა სამშაბათს საქართველოს საზღვარზე ქრთამის შესახებ ცნობებზე კომენტარი გააკეთა და განაცხადა, რომ ის ამ საკითხზე მიღებულ ყველა კომენტარს სომხეთის ანტიკორუფციულ კომიტეტში გადააგზავნიდა.

"ეს მნიშვნელოვანია, რადგან თუ ნამდვილად არსებობს ქრთამის ფაქტები, ეს უნდა გამოაშკარავდეს და ასევე ინფორმაცია ქართველ კოლეგებს მიეწოდოს", — დაწერა პაპოიანმა.

პაპოიანი, ამ მოვლენების დაწყებიდან, ფეისბუქის მეშვეობით პერიოდულად, თავის მიმდევრებს საქართველოს საზღვარზე შექმნილ სიტუაციაზე ინფორმაციას აწვდიდა.

ერთ-ერთმა ფეისბუქ მომხმარებელმა პაპოიანს სტატუსზე კომენტარში სთხოვა განმარტება გაეკეთებინა იმის შესახებ, რომ სატვირთოს მძღოლებს ქრთამის სახით $1,200 სთხოვენ.

რადიო თავისუფლება (RFE/RL) ანონიმურ წყაროს ციტირებს, რომლის თქმითაც, "სომხეთში შესვლის ნებართვისთვის", ქართული მხარე თითქოს თითოეულ სატვირთოზე $1,500-ს ითხოვს, წინააღმდეგ შემთხვევაში მძღოლები იძულებულნი არიან სიცხეში გრძელ რიგში იდგნენ. გამოცემის ცნობით, LPG-ს იმპორტიორები ქრთამს აძლევენ სომხეთში მყოფ "შუამავალ პირს", რომელიც შემდეგ შესაბამის უწყებებს აკონტაქტებს და სატვირთოებს გზას უხსნის. წყაროს თანახმად, სხვა ქვეყნებიდან შემოსული სატვირთოები მსგავსი სირთულეების წინაშე არ დგანან.

იმპორტიორებმა ადრეც განაცხადეს, რომ არ იცოდნენ პრობლემის გამომწვევი მიზეზი, და რომ მათ მსგავსი დაბრკოლებები მხოლოდ ამინდის ან სხვა "ობიექტური" გარემოებების დროს ჰქონდათ.

სომხეთის ხელისუფლებას იმის შესახებ, თუ რატომ ეზღუდებათ სომხურ სატვირთოებს საქართველოს გავლით შესვლა, განცხადება არ გაუკთებია.

პაპოიანმა პარასკევს პოსტი გამოაქვეყნა, რომელშიც განაცხადა, რომ ხუთშაბათს სომხეთში 77 LPG სატვირთო შევიდა, ხოლო ბოლო ერთი კვირის განმავლობაში — 331 სატვირთო.

"ვფიქრობ, უკვე დროა კონკურენციის დაცვის კომისიამ გაარკვიოს თხევადი გაზის ბაზარზე ფასის ცვლილებების საკითხი", — დაასკვნა პაპოიანმა.

"სრული სიცრუე"

LPG-ის მიწოდების შეფერხების და სომხეთში ფასების მკვეთრი ზრდის შესახებ ერთკვირიანი გაშუქების შემდეგ, საქართველოს ხელისუფლებამ რუსეთის საზღვარზე გაჩერებული სომხური სატვირთოების შესახებ ინფორმაცია უარყო და შეაფასა როგორც "კიდევ ერთი დეზინფორმაციული განცხადება, რომელიც საქართველოში მედიის ზოგიერთი წარმომადგენლისა და ოპოზიციური პარტიების მხრიდან გაკეთდა."

საქართველოს ფინანსთა სამინისტროს შემოსავლების სამსახურმა ოთხშაბათს გამოქვეყნებულ პოსტში ასევე უარყო სომხური ტვირთის, მათ შორის გაზის პროდუქციის "შეჩერება".

"ეს სრული სიცრუეა, რომელიც საზოგადოების შეცდომაში შეყვანას, ინსტიტუტების დისკრედიტაციასა და საკითხის პოლიტიზებას ემსახურება", ნათქვამია განცხადებაში.

სამაგიეროდ, უწყებამ განმარტა, რომ:

"გაზრდილი სატვირთო ნაკადის პირობებში, საერთაშორისო გადაზიდვებში ჩართული სატვირთოებისთვის საბაჟო პროცედურები ხორციელდება სპეციალურ/აქტიურ რეჟიმში, რათა მათი შეუფერხებლად შესრულება მოხდეს".

ონლაინ გავრცელებულ ვიდეოებში ზემო ლარსის გამშვებ პუნქტზე გრძელი რიგები ჩანს, სადაც მდგომი სატვირთოები სავარაუდოდ LPG-ს ეზიდებიან. ერთ-ერთ ვიდეოში მძღოლები ტანკერებს წყლის ჭავლის საშუალებით აგრილებენ სიცხეში, რათა გაზის გაჟონვის ან აფეთქების საფრთხე აირიდონ.

ამ ვიდეოებზე კომენტარისას საქართველოს ხელისუფლებამ განაცხადა, რომ ისინი არ ასახავენ "ზემო ლარსის გამშვებ პუნქტზე რეალურ მდგომარეობას", სადაც "მხოლოდ მცირე დროით იყო შეფერხება სატვირთოებისთვის, რომელიც სრულად აღმოიფხვრა".

საქართველოს მხრიდან სომხეთისთვის გაზის მიწოდების შეფერხება იმ პერიოდს დაემთხვა, როდესაც ორ ქვეყანას შორის დავა გაჩნდა, რის შედეგადაც საქართველომ სატვირთოები, რომლებიც სომხურ ბრენდის კონიაკს ეზიდებოდნენ რუსეთისკენ არ გაატარა.

აპრილის ბოლოდან სომხური ტვირთი საქართველოში შემოწმებას ექვემდებარებოდა, რამაც ფაქტობრივად სომხური კონიაკის ტრანზიტი შეაჩერა. ივლისის დასაწყისისათვის გავრცელებული ინფორმაციით, მიუხედავად ორ მხარეს შორის გამართული შეხვედრებისა, კონიაკის სატვირთოებთან დაკავშირებული საკითხები კვლავ მოუგვარებელი იყო.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.