გერმანიის კანცლერმა ფრიდრიხ მერცმა უკრაინისთვის ევროკავშირის "ასოცირებული წევრობის" ინიციატივა გააჟღერა. მისი თქმით, ეს ხელს შეუწყობს რუსეთის შემოჭრით გამოწვეული ომის დასასრულებლად შეთანხმების მიღწევას. ინფორმაციას Reuters ავრცელებს.

ევროკავშირის ლიდერებისადმი მიწერილ წერილში, რომელიც Reuters-მა მოიპოვა, მერცი გამოდის ინიციატივით, რომ უკრაინას მიენიჭოს ახალი, "ასოცირებული წევრის" სტატუსი. ეს უკრაინელ მაღალჩინოსნებს საშუალებას მისცემს, მონაწილეობა მიიღონ ევროკავშირის სამიტებსა და მინისტრების შეხვედრებში, თუმცა ხმის უფლების გარეშე.

გერმანიის ლიდერმა ევროკავშირის წევრებს ასევე შესთავაზა, უკრაინაზე ბლოკის ურთიერთდახმარების პუნქტის გავრცელების შესახებ "პოლიტიკური ვალდებულება" აიღონ, "რათა შეიქმნას არსებითი უსაფრთხოების გარანტია".

"ჩემი წინადადება ასახავს უკრაინის განსაკუთრებულ მდგომარეობას — ქვეყნისა, რომელიც ომში იმყოფება. ეს ხელს შეუწყობს მიმდინარე სამშვიდობო მოლაპარაკებებს, როგორც მოლაპარაკებების გზით მიღწეული სამშვიდობო გადაწყვეტის ნაწილს," — წერს მერცი და აღნიშნავს, რომ ეს "არსებითია არა მხოლოდ უკრაინის, არამედ მთელი კონტინენტის უსაფრთხოებისთვის".

Reuters- ის ცნობით, ევროპელი ოფიციალური პირები აცხადებენ, რომ მომდევნო რამდენიმე წელიწადში უკრაინის მიერ ბლოკის სრულუფლებიანი წევრობის მიღწევა არარეალისტურია, მიუხედავად იმისა, რომ უკრაინასა და რუსეთს შორის განხილულ აშშ-ს 20-პუნქტიან სამშვიდობო გეგმაში თარიღად 2027 წელი იყო მონიშნული.

ცნობისთვის, ევროკავშირში გაწევრიანების პროცესი, როგორც წესი, ხანგრძლივი და ბიუროკრატიულია. ის მოიცავს დეტალურ მოლაპარაკებებსა და სამართლებრივ რეფორმებს, რათა ქვეყანამ დააკმაყოფილოს ევროკავშირის დემოკრატიული და ეკონომიკური სტანდარტები.

ევროკავშირში გაწევრიანება მოითხოვს ბლოკის 27-ვე წევრის თანხმობასა და რატიფიკაციას, რამაც შესაძლოა მნიშვნელოვანი დაბრკოლებები შექმნას.