რუსეთის მიერ ოკუპირებული ცხინვალის რეგიონის გამყოფ ხაზთან, სოფელ ხურვალეთში მცხოვრები საქართველოს მოქალაქე, ვალია ვანიშვილი 18 მაისს გარდაიცვალა. ის დღეს დაკრძალეს.

"ქართლის ამბების" ცნობით, ვალია ვანიშვილის დაკრძალვაზე დასასწრებად ნათესავებს ხურვალეთში მავთულხლართებზე გადასვლა მოუწიათ.

მის დაკრძალვაზე ჩასულებს, ხურვალეთში შესვლის უფლება არ მისცეს. როგორც ოპოზიციონერი პოლიტიკოსი თეონა ჭალიძე წერს, მოქალაქეს რომელიც დაკრძალვაზე ჩამოვიდა და მათთან ერთად შეაყოვნეს, სასწრაფოს დახმარება დასჭირდა. ამასობაში ვალია ვალიშვილი გამოასვენეს. სახელმწიფო უსაფრთხოების სამსახურმა კი ჩასულები მავთულხლართებამდეც არ მიუშვეს.

"მოქალაქეს რომელიც დაკრძალვაზე ჩამოვიდა და აქ ჩვენთან ერთად შეაყოვნეს სასწრაფოს დახმარება დასჭირდა... ამასობაში ქალბატონი ვალია ვალიშვილი გამოასვენეს... ჩვენ კი მავთულხლართებამდეც არ მიგვიშვეს, საგუშაგოსთან ვდგავართ ისევ და ველოდებით", — წერს თეონა ჭალიძე.

ვალია ვანიშვილის მეუღლე, დათა ვანიშვილი, 2021 წელს 88 წლის ასაკში გარდაიცვალა. ცოლ-ქმარი წლების განმავლობაში მავთულხლართებს მიღმა მარტონი ცხოვრობდნენ.