ევროპის საბჭოს საპარლამენტო ასამბლეის (PACE) მონიტორინგმა საქართველოზე ანგარიში მოამზადა, რომელსაც ივნისის სესიაზე კენჭი ეყრება. PACE-ის განცხადებაში ვკითხულობთ, რომ კომიტეტმა "სერიოზული შეშფოთება გამოხატა საქართველოში დემოკრატიული რღვევისა და ღრმა პოლიტიკური და სოციალური კრიზისის გამო" და საქართველო გააფრთხილა, რომ "დემოკრატიული უკუსვლა შეუფერხებლად გრძელდება, ისევე როგორც რეპრესიები სამოქალაქო საზოგადოების, პოლიტიკური ოპოზიციისა და განსხვავებული აზრის მქონე პირების მიმართ".

რეზოლუციის პროექტში, რომელიც მომზადებულია თანამომხსენებლების, ედიტე ესტრელასა და საბინა ჩუდიჩის, ანგარიშის საფუძველზე ხაზგსამულია, რომ "ასამბლეის არცერთი რეკომენდაცია არ იქნა გათვალისწინებული" და აღნიშნულია, რომ დემოკრატიის უწყვეტი რღვევა "სერიოზულ ეჭვს აჩენს ხელისუფლების მზადყოფნაზე, საქართველოს მიერ ევროსაბჭოს წინაშე ნაკისრი წევრობის ვალდებულებები და ასოცირების პირობები შეასრულოს".

კომიტეტმა ხაზგასმით აღნიშნა, რომ "ევროსაბჭოს წევრობა არის პრივილეგია, რომელსაც თან ახლავს უფლებები და მოვალეობები", რომ ორგანიზაციის პრინციპები და სტანდარტები "ეჭქვეშ არ დაყენდება".

კომიტეტმა "მიუღებლად" შეაფასა ინიციატივა "საქართველოში პრაქტიკულად ყველა დემოკრატიული ოპოზიციური პარტიის აკრძალვისა და მათი ხელმძღვანელობის სისხლისსამართლებრივი დევნის შესახებ, პოლიტიკურად მოტივირებული და შეთითხნილი ბრალდებებით" და მმართველი პარტია გააფრთხილა, რომ "ამ კურსის გაგრძელების შემთხვევაში, ეს ქმედება საქართველოში ეფექტურად დაამყარებს ერთპარტიულ დიქტატურას".

კომიტეტი ასევე ხაზს უსვამს, რომ "საქართველოში ამჟამად არ არსებობს პირობები ჭეშმარიტად დემოკრატიული არჩევნების ჩასატარებლად", დემოკრატიულ ოპოზიციაზე, სამოქალაქო საზოგადოებასა და დამოუკიდებელ მედიაზე "უწყვეტი ზეწოლის, ისევე როგორც ქვეყანაში არსებული უკიდურესი სოციალური და პოლიტიკური პოლარიზაციის გამო".

რეზოლუციის პროექტი მოითხოვს რეპრესიული კანონმდებლობის გაუქმებას და "სამოქალაქო საზოგადოების ორგანიზაციებზე, მათ ხელმძღვანელობასა და დამოუკიდებელ მედიაზე მიმდინარე თავდასხმებს" გმობს.

ასამბლეამ მოუწოდა საქართველოს ხელისუფლებას, სრულად შეასრულოს ადამიანის უფლებათა ევროპული სასამართლოს გადაწყვეტილებები და ეუთოს (OSCE) მოსკოვის მექანიზმის ფარგლებში შემუშავებული რეკომენდაციები.