მთავრობის გადაწყვეტილებით, კულტურის სამინისტროს მმართველობაში მოქმედი სახელმწიფო მუზეუმები მწერალთა სახლის მმართველობის სფეროში მოექცევიან და მის სტრუქტურულ ერთეულად იქცევიან. შესაბამისი დადგენილება 2026 წლის 20 მაისითაა დათარიღებული და მას ხელს ირაკლი კობახიძე აწერს.

დოკუმენტის მიხედვით, საქართველოს კულტურის სამინისტროს მმართველობის სფეროში მოქმედი მწერალთა სახლი მწერალთა მუზეუმების გაერთიანებად გარდაიქმნება, თუმცა სახელი კვლავ ძველი — მწერალთა სახლი დარჩება.

რეორგანიზაცია შეეხებათ: საგურამოს ილია ჭავჭავაძის სახელმწიფო მუზეუმს, ილია ჭავჭავაძის ყვარლის სახელმწიფო მუზეუმს, აკაკი წერეთლის სახელმწიფო მუზეუმს, გალაკტიონ და ტიციან ტაბიძეების სახლ-მუზეუმს, ვაჟა-ფშაველას სახლ-მუზეუმს, იაკობ გოგებაშვილის სახლ-მუზეუმსა და ივანე მაჩაბლის მუზეუმს.

"მწერალთა სახლის დირექტორის თანამდებობაზე დასაქმებული პირი, მისი წერილობითი თანხმობის შემთხვევაში, 2026 წლის 25 მაისიდან გადაინიშნოს მწერალთა სახლში იმავე თანამდებობაზე. თუ ამ პუნქტით განსაზღვრული პირი არ გამოხატავს წერილობით თანხმობას 2026 წლის 23 მაისამდე, გათავისუფლდეს დაკავებული თანამდებობიდან, საქართველოს კანონმდებლობის შესაბამისად.

ამ პუნქტის ამოქმედების მომენტისთვის სსიპ − საგურამოს ილია ჭავჭავაძის სახელმწიფო მუზეუმის, სსიპ − ილია ჭავჭავაძის ყვარლის სახელმწიფო მუზეუმის, სსიპ − აკაკი წერეთლის სახელმწიფო მუზეუმის, სსიპ − გალაკტიონ და ტიციან ტაბიძეების სახლ-მუზეუმის, სსიპ − ვაჟა-ფშაველას სახლ-მუზეუმის, სსიპ − იაკობ გოგებაშვილის სახლ-მუზეუმისა და სსიპ − ივანე მაჩაბლის მუზეუმის დირექტორების/დირექტორების მოადგილეების თანამდებობებზე დასაქმებული პირები, მათი წერილობითი თანხმობის შემთხვევაში, 2026 წლის 25 მაისიდან გადაინიშნონ მწერალთა სახლის შესაბამისი სტრუქტურული ერთეულების ხელმძღვანელებად/ ხელმძღვანელების მოადგილეებად. თუ ამ პუნქტით განსაზღვრული პირები არ გამოხატავენ წერილობით თანხმობას 2026 წლის 23 მაისამდე, გათავისუფლდნენ დაკავებული თანამდებობებიდან, საქართველოს კანონმდებლობის შესაბამისად", — წერია მთავრობის დადგენილებაში.

ცნობისათვის, მწერალთა სახლის დირექტორი 2023 წლის სექტემბრიდან ქეთევან დუმბაძე. მან ამ თანამდებობაზე ნატა ლომოური შეცვალა.