განათლების, მეცნიერებისა და ახალგაზრდობის სამინისტროს შპს "საგანმანათლებლო რესურსებმა" 2026-2027 სასწავლო წლისთვის დაწყებითი საფეხურის მოსწავლეების სასკოლო ფორმებისთვის ბაზრის კვლევა განმეორებით გამოაცხადა. ბაზრის კვლევა 25 მაისს 12:00 საათზე დასრულდება.

ბაზრის კვლევა კვლავ 1 801 000 ერთეულზეა გამოცხადებული — მიწოდება სამ ეტაპად განხორციელდება. პირველი ეტაპი 25 აგვისტომდე 301 ათასი ერთეულის მიწოდებას მოიცავს. მეორე ეტაპი — 600 ათასი ერთეულის მიწოდებას 15 ოქტომბრამდე, ხოლო მესამე ეტაპი 900 ათასი ერთეულის მიწოდებას 30 ნოემბრამდე.

შეგახსენებთ, 2026 წლის 5 თებერვალს "ზოგადი განათლების შესახებ" კანონში შეტანილი ცვლილების საფუძველზე 2026–2027 სასწავლო წლიდან საჯარო სკოლის დაწყებითი საფეხურის მოსწავლეებისთვის სასკოლო ფორმის ტარება სავალდებულო გახდა.

განათლების, მეცნიერებისა და ახალგაზრდობის სამინისტროს შპს "საგანმანათლებლო რესურსების" მიერ 2026 წლის 3 აპრილს გამოცხადდა კვლევა 2026-2027 სასწავლო წლისთვის საჯარო სკოლების დაწყებითი საფეხურის მოსწავლეებისთვის 1 801 000 ცალი სასკოლო ფორმის შესყიდვის სავარაუდო ღირებულების დადგენის მიზნით.