ადამიანის უფლებათა ორგანიზაცია Amnesty International-ის აღმოსავლეთ ევროპისა და ცენტრალური აზიის პროგრამის დირექტორის მოადგილემ დენის კრივოშეევმა ოპოზიციონერი პოლიტიკოსის, გიორგი (გივი) თარგამაძის დაპატიმრება მწვავედ გააკრიტიკა კრივოშეევის თქმით, ეს ხელისუფლების მცდელობაა საკანონმდებლო და საპოლიციო ბერკეტების გამოყენებით კრიტიკოსები გააჩუმოს.

გივი თარგამაძეს 27 ივნისს თბილისის საქალაქო სასამართლომ პარლამენტის საგამოძიებო კომისიაზე გამოუცხადებლობისთვის შვიდი თვით თავისუფლების აღკვეთა მიუსაჯა.

კრივოშეევის თქმით, ამ კითხვის ნიშნის ქვეშ მყოფმა კომისიამ პოლიტიკური დევნის იარაღად გადაქცევა დაიწყო და ლეგიტიმური ოპოზიციის წინააღმდეგ გამოიყენება, განსაკუთრებით ადგილობრივ არჩევნებამდე. მან ასევე ოპოზიციისა და სამოქალაქო აქტივისტების დაპატიმრებების სერია, რეპრესიული კანონები და სამოქალაქო საზოგადოების ჩახშობის მცდელობები დაგმო.

კრივოშეევმა საქართველოს ხელისუფლებას მოუწოდა, შეწყვიტოს მშვიდობიანი პროტესტის დასჯა, გაათავისუფლოს დაკავებული ოპოზიციონერები და დაიცვას თავისი საერთაშორისო ვალდებულებები ადამიანის უფლებათა დაცვის კუთხით.

"ის [კომისია] გახდა პოლიტიკური რეპრესიის ინსტრუმენტი და არა საპარლამენტო კონტროლის, რომელიც გამოიყენება პოლიტიკური ოპონენტების ადგილობრივი არჩევნების წინ დაკავებისთვის. მმართველი პარტიის მიერ საპარლამენტო სტრუქტურების ბოროტად გამოყენება კრიტიკოსების მიმართ, უფრო ფართო რეპრესიების ნაწილია, რაც მოიცავს აქტივისტებისა და მშვიდობიანი მომიტინგეების თვითნებურ დაკავებას და დევნას, ასევე სამოქალაქო საზოგადოების ხმის ჩახშობას რეპრესიული კანონმდებლობითა და უკანონო მოთხოვნებით.

საქართველოს ხელისუფლებამ უნდა შეწყვიტოს დაუნდობელი თავდასხმა განსხვავებული აზრის მქონე პირებზე და მომიტინგეებისა და პოლიტიკური აქტივისტების მიზანში ამოღება და გაათავისუფლოს გივი თარგამაძე და ოპოზიციის კიდევ ექვსი წევრი, რომლებიც ბოლო კვირების განმავლობაში ციხეში ჩასვეს. ხელისუფლებამ უნდა შეწყვიტოს ისეთი პრაქტიკა, რომელიც არღვევს საერთაშორისო ადამიანის უფლებებს. ხელისუფლებამ უნდა დაიცვას და უზრუნველყოს ქვეყანაში ყველას ადამიანის უფლება," — ვკითხულობთ Amnesty Georgia-ს აღმოსავლეთ ევროპისა და ცენტრალური აზიის დირექტორის მოადგილე, დენის კრივოშეევის განცხადებაში.

ცნობისთვის, გივი თარგამაძე არის მერვე ოპოზიციონერი ფიგურა, ვინც ამ პროცესების ფარგლებში დააკავეს, და მეხუთე, რომელმაც პატიმრობა მიიღო. ახლახან შვიდთვიანი სასჯელები დაეკისრათ გიორგი ვაშაძესა და ზურაბ ჯაფარიძეს, ხოლო მამუკა ხაზარაძესა და ბადრი ჯაფარიძეს — რვათვიანი. ყველა მათგანს ორი წლით საჯარო თანამდებობის დაკავება აეკრძალა. ასევე დაკავებულები არიან ნიკა მელია, ნიკა გვარამია და ირაკლი ოქრუაშვილი.