პარტია ევროპული საქართველო აცხადებს, რომ დღეს, 23 სექტემბერს, ევროპული საქართველოს მაჟორიტარობის კანდიდატს ალი მამედოვს სოფელ სადახლოში, მარნეულში თავს დაესხნენ.

პარტიის ინფორმაციით, თავდამსხმელებს შორის იყვნენ სადახლოში ქართული ოცნების მაჟორიტარობის კანდიდატი როვშან ისკანდაროვი და გამგეობის თანამშრომელი მუხამედ ალიბედიევი:

"თავდამსხმელებმა სიტყვიერი და ფიზიკური შეურაცხყოფა მიაყენეს მამედოვს, რომელიც ახლა საავადმყოფოშია. მასთან ერთად იმყოფება მარნეულში ევროპული საქართველოს მერობის კანდიდატი აჰმედ იმამკულიევი".

შინაგან საქმეთა სამინისტროში On.ge-ს განუცხადეს, რომ აღნიშნულ ფაქტთან დაკავშირებით შეტყობინება 40 წუთის წინ შევიდა და გამოძიება სისხლის სამართლის კოდექსის 126-ე მუხლით დაიწყო, რაც ცემას გულისხმობს. უწყების ცნობით, დანაშაული ურთიერთშელაპარაკების ნიადაგზე მოხდა.