"სახელმწიფო უსაფრთხოების სექტორში მიმდინარე ცვლილებები ძალოვანი სტრუქტურების პოლიტიზაციის საგანგაშო რეალობას ქმნის" — ამის შესახებ სოციალური სამართლიანობის ცენტრის (SJC) განცხადებაშია აღნიშნული.

ორგანიზაციის შეფასებით, ეს ტენდენციები ქვეყნის უსაფრთხოების სისტემის დასუსტებას გამოიწვევს. მათი თქმით, ოცნების მმართველობის პერიოდში სუს-ის პოლიტიზება ყოველთვის "სერიოზულ გამოწვევას წარმოადგენდა და თანამდებობაზე ანრი ოხანაშვილის დამტკიცება ამ მხრივ ახალ შრეს იძენს". ამასთან, როგორც ორგანიზაციის განცხადებაშია აღნიშნული, ძალაუფლების დაბალანსების, პროფესიული და პრაქტიკული ამოცანების შესრულების კუთხით უკან გადადგმული ნაბიჯია დაზვერვის სამსახურის შეერთება სუს-თან.

სოციალური სამართლიანობის ცენტრი აცხადებს, რომ ეს ყოველივე კიდევ ერთი საგანგაშო სიგნალია "დემოკრატიული უკუსვლის, ძალაუფლების კონსოლიდაციისა და არა-ანგარიშვალდებული ძალოვანი სტრუქტურების გაძლიერების გზაზე"

"უსაფრთხოების სექტორში ბოლო კვირებში მნიშვნელოვანი ინსტიტუციური და პერსონალური ცვლილებები განხორციელდა, რომელიც მთლიანობაში სექტორის პოლიტიზაციისა და ძალაუფლების კონსოლიდაციის მიზნებისთვის ძალოვანი უწყებების მობილიზაციის საგანგაშო ნიშნებს ატარებს. ეს ტენდენციები ქვეყნის უსაფრთხოების სისტემის დასუსტებასა და მწვავე საფრთხეების მიმართ მედეგობის რღვევას გამოიწვევს.

როგორც საზოგადოებისთვის ცნობილია, ბოლო კვირებში ქართულმა ოცნებამ მიიღო არა ერთი ახალი გადაწყვეტილება, რომელმაც ძირეული ცვლილებები გამოიწვია უსაფრთხოების სისტემის შიგნით, მათ შორის, შეიცვალა სახელმწიფო უსაფრთხოების სამსახურის უფროსი, დაიწყო დაზვერვის სამსახურის სუს-თან გაერთიანების საკანონმდებლო პროცესი, და დაანონსდა ეროვნული უსაფრთხოების საბჭოს გაუქმება. ეს ყოველივე კიდევ ერთი საგანგაშო სიგნალია დემოკრატიული უკუსვლის, ძალაუფლების კონსოლიდაციისა და არა-ანგარიშვალდებული ძალოვანი სტრუქტურების გაძლიერების გზაზე.

მიუხედავად იმისა, რომ ქართული ოცნების მმართველობის პერიოდში სუს-ის პოლიტიზება ყოველთვის სერიოზულ გამოწვევას წარმოადგენდა, თანამდებობაზე ანრი ოხანაშვილის დამტკიცება ამ მხრივ ახალ შრეს იძენს. ერთპარტიული პარლამენტის მიერ ქართული ოცნების წევრისა და ირაკლი კობახიძის პირადი კადრის სუს-ის ხელმძღვანელად დანიშვნა, ყოველგვარი კრიტიკული განხილვებისა და დელიბერაციის გარეშე, სუს-ს იმ მინიმალურ ინსტიტუციურ თუ პერსონალურ აგენტობასაც უკარგავს, რაც, უწყების წინამორბედ ხელმძღვანელებს შესაძლოა გარკვეული ხარისხით მაინც ჰქონოდა.

ძალაუფლების დაბალანსების, პროფესიული და პრაქტიკული ამოცანების შესრულების კუთხით უკან გადადგმული ნაბიჯია დაზვერვის სამსახურის შეერთება სუს-თან. 2013 წლიდან სამსახური არის პრემიერმინისტრის უშუალო დაქვემდებარებაში არსებული უწყება და მის გარდა არც ერთ სხვა უწყებასთან ინსტიტუციურ ანგარიშვალდებულებაში არ იმყოფება. ახალი კანონპროექტით დაზვერვის სამსახური სუს-ის ერთ-ერთი სააგენტო ხდება, რომელიც ანგარიშვალდებული იქნება სუს-ის უფროსის წინაშე. დაზვერვის სააგენტოს ხელმძღვანელს, ისევე როგორც მის მოადგილეებს, სუს-ის უფროსი დანიშნავს. კანონპროექტი უკვე მიღებულია ორი მოსმენით.

აშკარაა, რომ ძალაუფლების კონსოლიდაცია ერთპარტიული კონტროლის ქვეშ და უსაფრთხოების სისტემაში კადრების შერჩევა პარტიული ლოიალურობის საფუძველზე არღვევს პროფესიული ნეიტრალობის პრინციპს და საბოლოოდ, ასუსტებს სახელმწიფო უსაფრთხოების სტრუქტურების სტაბილურობას. ამ პირობებში უსაფრთხოების უწყებები კარგავენ თავიანთ პრინციპულ ფუნქციას ემსახურონ დემოკრატიულ წესრიგსა და საზოგადოებრივ უსაფრთხოებას და გადაქცეულნი არიან მმართველი პარტიის ხელისუფლების შენარჩუნების მექანიზმად. ეს ტენდენციები ქმნის საპოლიციო სახელმწიფოს (Surveillance State) იმ მოდელს, სადაც ძალოვანი სტრუქტურები სამოქალაქო სივრცის კონტროლის, წინააღმდეგობათა ჩახშობისა და საჯარო ცხოვრების ტოტალური მონიტორინგისთვის და ზედამხედველობისთვის გამოიყენება და ზღვარი ეროვნული უსაფრთხოებისა და რეჟიმის პოლიტიკურ უსაფრთხოებას შორის წაშლილია" — ნათქვამია განცხადებაში.