ტელეკომპანია "იმედის" მფლობელი ბიზნესმენის, ირაკლი რუხაძის კუთვნილ "ლიბერთი ბანკს" "ბაზისბანკი" ყიდულობს. როგორც რუხაძე მედიასთან საუბრისას აცხადებს, მოლაპარაკებები ჯერ არ დასრულებულა და თუ გარიგება შედგა, მიესალმება.

"ველაპარაკებით ბაზის ბანკს, მაგრამ არ დასრულებულა და იმასაც ვერ გეტყვით დასრულდება, ან როდის დასრულდება. უბრალოდ მიდის ლაპარაკი. მთავარი ვინც განიხილება, არის "ბაზისბანკი". რატომღაც ეს პროცესი სხვანაირად წავიდა, შეიძლება სხვა გაჩნდეს, ან საერთოდ უარი ვთქვათ გაყიდვაზე", — აცხადებს ირაკლი რუხაძე "ტვ პირველთან" საუბრისას.

ჟურნალისტის კითხვაზე, ჩინეთის ინტერესი საბანკო სექტორშიც შემოდის თუ არა? რუხაძე პასუხობს, რომ თუ ეს გარიგება შედგა, რაიმე განსაკუთრებული ცვლილებას არ ელოდება "გარდა იმისა, რომ გაჩნდება ძალიან საინტერესო ბანკი, მესამე ბანკი, რომელიც იქნება ორჯერ დიდი, ვიდრე, დღევანდელი მესამე ბანკია". მისივე თქმით, საქართველოში ჩინური ფულის შემოსვლა არ ნიშნავს ქვეყნის [ჩინეთის] შემოსვლას.

"ჩვენ ყველანი ვმონაწილეობთ ქართულ საბანკო სისტემაში და ვთამაშობთ იმ წესებით, რომელიც საქართველოს მთავრობის ერთ-ერთმა წარმომადგენელმა, ეროვნულმა ბანკმა. ამიტომ ვერ ვხედავ, განსაკუთრებულ ცვლილებას არ ველოდები, გარდა იმისა, რომ გაჩნდება ძალიან საინტერესო ბანკი, მესამე ბანკი, რომელიც იქნება ორჯერ დიდი, ვიდრე, დღევანდელი მესამე ბანკია.

... ბაზის ბანკში 10 წელია ჩინური ფულია და შეგიძლიათ დამისახელოთ რა მოჰყვა მას? თუ მოჰყვება მხოლოდ კარგი. მხოლოდ მივესალმები, რომ რაც შეიძლება მეტი ფული შემოვიდეს. ჩინური ფულის შემოსვლა არ ნიშნავს ქვეყნის [ჩინეთის] შემოსვლას", — განაცხადა რუხაძემ.

BM.GE-ს ცნობით, "ლიბერთი ბანკი" უკვე მრავალი წელია საქართველოს რიგით მესამე უმსხვილესი ბანკია. 2025 წლის აპრილის მდგომარეობით, ბანკის აქტივები 5.45 მილიარდ ლარს შეადგენს, ხოლო მისი საკრედიტო პორტფელი 3.9 მილიარდი ლარია. ამასთან, ბანკს 2025 წლის 4 თვეში 40 მილიონი ლარის მოგება ჰქონდა.

რაც შეეხება "ბაზისბანკს", ბანკი ჩინური "ჰუალინგ ჯგუფის" საკუთრებაშია. ის აქტივების ზომით, ანუ 4 მილიარდი ლარით საქართველოს რიგით მეოთხე ბანკია, ხოლო მისი საკრედიტო პორტფელი 3 მილიარდი ლარია. ბანკს 2025 წლის 4 თვეში 31 მილიონი ლარის მოგება ჰქონდა.

შედეგად, გარიგების საფუძველზე ჩამოყალიბებული ბანკის აქტივების ზომა იქნება 9 მილიარდი ლარი, ხოლო საკრედიტო პორტფელი კი თითქმის — 7 მილიარდი ლარი. ამ მაჩვენებლით, ის აქტივებით და კრედიტების ზომით საბანკო სისტემის 10%-ს დაიკავებს, — წერს bm.ge.

შეგახსენებთ, რომ 6 მაისს, რესპუბლიკელმა სენატორმა ჯო უილსონმა გამოაქვეყნა სია, თუ ვის შეეხება სანქციები MEGOBARI აქტის საბოლოო დამტკიცების შემთხვევაში. ამ სიაშია ირაკლი რუხაძე. ის ასევე სანქცირებულია უკრაინის და ბალტიის ქვეყნების მიერ.

ამას გარდა, დიდი ბრიტანეთის პარლამენტში "ტვ იმედის" წინააღმდეგ გამოძიების დაწყება განიხილება. ლეიბორისტული პარტიის დეპუტატმა და საგარეო ურთიერთობათა კომიტეტის წევრმა, ბლერ მაკდუგალმა დააყენა საკითხი, რომ ბრიტანეთის ეროვნულმა კრიმინალურმა სააგენტომ (NCA) დაიწყოს კომპანია Hunnewell Partners-ის იმ ოპერაციებთან დაკავშირებით გამოძიება, რაც საქართველოში პრორუსულ პროპაგანდასა და მშვიდობიანი მომიტინგეების წინააღმდეგ ძალადობის წაქეზებასთანაა დაკავშირებული.

ბლერ მაკდუგალის თქმით, საქართველოში "მშვიდობიანი მომიტინგეების ძალადობრივი დარბევა ხდება", ტელეკომპანია იმედი კი, "ამ სასტიკი მთავრობის მთავარი პროპაგანდის იარაღია და მუშაობს და იმართება დიდ ბრიტანეთში დაფუძნებული კომპანია Hunnewell Partners-ის მეშვეობით".

ამას გარდა, რადიო თავისუფლებამ 2025 წლის 9 იანვარს გამოაქვეყნა სტატია, სადაც ნათქვამია, რომ აშშ-ის კონგრესის წევრებმა აშშ-ის ახალ ადმინისტრაციას, კერძოდ — აშშ-ის მომდევნო სახელმწიფო მდივანს, მარკო რუბიოს გაუგზავნეს წერილი, სადაც მოცემულია 25 პირისგან შემდგარი სია, რომელთა დასანქცირებასაც კონგრესმენები მოითხოვდნენ და ამ ადამიანებს შორისაა იმედის მფლობელი (აშშ-ის მოქალაქე) ირაკლი რუხაძე.

მეტი ირაკლი რუხაძის შესახებ: