ნიდერლანდების პარლამენტში სადეპუტატო კითხვები დარეგისტრირდა ტვ იმედის მშობელი კომპანიის შემოწმების შესახებ. ამის შესახებ თავდაპირველად ინფორმაცია კოალიცია ძლიერი საქართველო-ხალხისთვის ერთ-ერთმა ლიდერმა, ანა დოლიძემ გაავრცელა.

მისი თქმით, სადეპუტატო კითხვები არ მუშაობს საქართველოში, მაგრამ დემოკრატიულ ქვეყნებში ამას ძალიან დიდი მნიშვნელობა აქვს.

"ჩვენი მუშაობის შედეგად, დღეს ტელეკომპანია ,,იმედის” შემოწმებასთან დაკავშირებით, ნიდერლანდების პარლამენტში სადეპუტატო კითხვები ოფიციალურად დარეგისტრირდა. სადეპუტატო კითხვები არ მუშაობს ჩვენთან, მაგრამ დემოკრატიულ ქვეყნებში ამას აქვს ძალიან დიდი მნიშვნელობა. ჩვენ ამ მიმართულებით გავაგრძელებთ მუშაობას, მანამ საბოლოო შედეგი არ დადგება", — განაცხადა ანა დოლიძემ, რომლის კომენტარსაც პარტიის პრესსამსახური ავრცელებს.

როგორც ირკვევა, 13 მარტს ნიდერლანდების პარლამენტში საქართველოში არსებულ ვითარებაზე 10 სადეპუტატო კითხვა დარეგისტრირდა.

კითხვები ქვეყნის საგარეო საქმეთა მინისტრის, ასპარ ველდკამპის მისამართით მემარცხენე მწვანეთა შრომის პარტიის წევრმა, კატი პირმა დაარეგისტრირა.

როგორც ნიდერლანდების პარლამენტის ვებ-გვერდზე ვკითხულობთ, 10-დან 5 კითხვა ტვ იმედს უკავშირდება.

ნიდერლანდების პარლამენტის წევრს აინტერესებს:

  • ნიდერლანდების საგარეო საქმეთა მინისტრს აქვს თუ არ ინფორმაცია იმის შესახებ, რომ "ქართული ტელევიზია ტვ იმედის დედა კომპანია, რომელიც ავტორიტარული და პრორუსული ქართველის ოცნების ხელისუფლების რუპორია, დარეგისტრირებულია ამსტერდამში?"
  • ეთანხმებით თუ არა განცხადებას, რომ ტელეიმედს ოლიგარქები იყენებენ იმაში, რომ საქართველოს მთავრობამ კიდევ უფრო გადაუხვიოს ქვეყნის დემოკრატიულ გზიდან, რომ არხი ავრცელებს ყალბ ინფორმაციას საქართველოში ჩატარებული არჩევნების, ევროკავშირის და საქართველოში მიმდინარე საპროტესტო აქციების შესახებ?
  • მზად ხართ თუ არა ითანამშრომლოთ ფისკალური ინფორმაციისა და გამოძიების სამსახურთან (FIOD) ტელეკომპანია იმედის დედა კომპანია Finance Group B.V.-ის დახურვაზე?
  • ამას გარდა, კითხვებს შორისაა, აქვთ თუ არა ინფორმაცია იმაზე, რომ 7 მარტს 100 დღე გახდა, რაც საქართველოს მოსახლეობა ქუჩაშია გამოსული დემოკრატიისა და კანონის უზენაესობის მოთხოვნით;
  • რამდენი პროტესტანტი, პოლიტპატიმარი, ჟურნალისტი იმყოფება ქართულ ციხეებში და ა.შ.

ცნობისათვის, 2021 წელს ტელეკომპანია იმედის მესაკუთრე გახდა ბიზნესმენ ირაკლი რუხაძესთან დაკავშირებული Hunnewell Partners-ის კონტროლირებადი კომპანია. იმედის მფლობელი კომპანია ჯორჯიან მედია ფროდაქშენ გრუფის (Georgian Media Production Group) 100%-ანი წილი გადაეცა მედია ფაინენს გრუპ ბი.ვის (Media Finance Group B.V.), რომელიც Hunnewell Partners-ის კომპანიათა ჯგუფში შედის.

ამავე თემაზე:

დიდი ბრიტანეთის პარლამენტში "ტვ იმედის" წინააღმდეგ გამოძიების დაწყება განიხილება

ირაკლი რუხაძე: [ეკონომიკა] არ ინგრევა, ყველაფერი მიდის მშვენივრად