აჭარის პოლიციის დეპარტამენტის ყოფილი უფროსი და მზია ამაღლობელის საქმის ერთ-ერთი მთავარი ფიგურანტი, გრიგოლ ბესელია ცენტრალური კრიმინალური პოლიციის დეპარტამენტის დირექტორის, თეიმურაზ კუპატაძის მოადგილედ დანიშნეს.

ბათუმელების ინფორმაციით, ბესელია პოლიციაში მუშაობდა როგორც ნაციონალური მოძრაობის, ისე ქართული ოცნების მმართველობის დროს. ის 2022 წელს დაინიშნა აჭარის პოლიციის უფროსად, მანამდე იგი თბილისის მთავარი სამმართველოს უფროსის მოადგილე იყო. ბესელია ოცნების იმ თანამდებობის პირებს შორისაა, რომლებიც ბალტიისპირეთის ქვეყნებმა დაასანქცირეს.

გრიგოლ ბესელია და ბათუმის პოლიციის დეპარტამენტის უფროსი ირაკლი დგებუაძე უშუალოდ ხელმძღვანელობდნენ ბათუმში მიმდინარე პროევროპულ საპროტესტო აქციებზე პროტესტის მონაწილეების დაკავებას. 11 იანვარს, სწორედ გრიგოლ ბესელიამ დააკავა მზია ამაღლობელი პოლიციის დამხმარე ნაგებობაზე სტიკერის გაკვრისთვის.

28 აპრილს, ბათუმის საქალაქო სასამართლოში გრიგოლ ბესელია მზია ამაღლობელის საქმეზე მოწმის სახით დაიკითხა. ბესელიამ პროცესზე გაიხსენა 11 იანვრის, მზია ამაღლობელის დაკავების ღამე.

ბესელიამ მზია ამაღლობელის სილის გაწვნის ინციდენტზე ისაუბრა და განაცხადა, რომ გაკვირვებული იყო მზია ამაღლობელის "აგრესიით". ბესელიას თქმით, აჭარაში არ არიან მიჩვეულები "ასეთ აგრესიულ დამოკიდებულებას ქალებისგან". მოგვიანებით, ბესელიამ ბრალდების მხარის დასმულ კითხვაზე — გაიგო თუ არა სილის გაწვნის ხმა, უპასუხა:

”სახეში დაარტყა ხელი [...]. ისეთი ხმა იყო დარტყმის შემდეგ, მაგ ფაქტის შემდეგ დაიშალა საერთოდ აქცია,” — თქვა აჭარის პოლიციის ყოფილმა უფროსმა, გრიგოლ ბესელიამ მზია ამაღლობელის მიერ ირაკლი დგებუაძისთვის სილის გაწვნაზე.

ასევე იხილეთ:

შეგახსენებთ, ბათუმელებისა და ნეტგაზეთის დამფუძნებელი, ჟურნალისტი მზია ამაღლობელი 11-12 იანვარს ორჯერ დააკავეს. პირველად სტიკერის გაკვრისთვის, რომელსაც ეწერა: "იფიცება საქართველო 15 იანვარს 15:00 საათზე". რამდენიმე საათში ჟურნალისტი გაათავისუფლეს. მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს ორ სხვა პირთან ერთად.

ამაღლობელს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს.